Nëse qeveria do të kishte arritur të miratonte koncesionin e TVSH-së, i planifikuar në fillim të këtij viti, koncesionari për 6 muajt e parë të vitit do të kishte marrë një pjesë të konsiderueshme të të ardhurave të rritura, mbi 11%, që llogaritet se do arrinte në rreth 940 milionë lekë- 7 milionë euro (shiko tabelën), apo rreth 67% të gjithë shtesës së të ardhurave mbi 11%….
Tatimi Mbi Vlerën e Shtuar nga qarkullimi i brëndshëm pa një rritje të vrullshme këtë gjashtëmujor me 18.9 për qind më shumë se e njëjta periudhë e një viti më parë.
TVSH-ja bruto arriti në 21 milardë leke në janar qershor 2016 nga rreth 17.7 miliardë që ishin arkëtuar në gjashtëmujorin e parë të 2015.
Nëse ky shërbim do ti jepej një kompanie me private me koncesion siç kishte planifikuar qeveria në fillim të vitit, koncensionari do të kishte marrë miliona euro pa bërë asgjë. Kjo, pasi rritja e arkëtimeve të TVSH që ka siguruar qeveria është më e lartë se kufiri prej 11%, mbi të cilin kompania, që i propozoi në janar Ministrisë së Financave një skemë PPP në fushën e administrimit të TVSH-së, do të fillonte të merrte pjesën e vet të fitimit. Sipas skemës fillestare dhe formulës së ndarjes së të ardhurave në partneritetin publik privat (PPP) në fushën e administrimit të TVSH-së, ndarja e rritjes së të ardhurave do të fillonte mbi rritjen prej 11% të të ardhurave dhe konkretisht; nëse rritja do të ishte 0-4% mbi 11%, atëherë partneri do të merrte maksimalisht 90% të shtesës. Nëse rritja do të ishte nga 4-6% (mbi 11%) do të merrte maksimalisht 65% dhe po arriti nga 7-10% (gjithnjë mbi 11%) partneri privat të merrte 45% të shtesës.
Konkretisht, nëse qeveria do të kishte arritur të miratonte koncesionin e TVSH-së, i planifikuar në fillim të këtij viti, koncesionari për 6 muajt e parë të vitit do të kishte marrë një pjesë të konsiderueshme të të ardhurave të rritura, mbi 11%, që llogaritet se do arrinte në rreth 940 milionë lekë, apo rreth 7 milionë euro (shiko tabelën në fund), që përbën rreth 67% të gjithë shtesës së të ardhurave mbi 11%.
Zyrtarë të lartë të Ministrisë së Financave deklaruan në atë kohë se kufiri 11% është vendosur pasi nga të dhënat historike ka rezultuar se vetë administrata nuk mund të rrisë të ardhurat më shumë se kjo vlerë. Në fakt, pas 2008-s, ritmi i rritjes së të ardhurave të TVSH-së ka qenë negativ.
Por, zgjerimi prej 18.9% në 2016 dhe gati 15% në 2015-n dëshmon se edhe me mjetet që administrata zotëron aktualisht mund të ketë një rritje dyshifrore, sidomos pas aksionit informalitet që ka disiplinuar përdorimin e faturave nga bizneset, duke sjellë rritje të deklarimit të xhiros.
I planifikuar për t’u shpallur në shkurt, koncesioni për PPP-në në administrimin e TVSH-së u shty në heshtje nga financat. Shtyrja erdhi pas presionit të Fondit Monetar Ndërkombëtar, i cili kërkoi që të bëhet një analizë e plotë e kostove dhe përfitimeve të tij. Termat e referencës iu dërguan për rishikim FMN-së dhe ky i fundit ka hartuar një raport me rekomandime, ndërsa zyrtarët e qeverisë nuk e përmendën më këtë koncesion.
Thelbi i propozimit të partneritetit publik-privat ishte një platformë teknologjike, që zëvendeson dhe zgjeron sistemin aktual të deklarimeve fiskale, Nexus, me të cilin operohet prej disa vitesh në DPT dhe në të cilin kasat aktuale fiskale deklarojnë të dhënat ditore. MONITOR
