Në Lojrat Olimpike vjen momenti i Neymar Jr. Me një gol dhe një asist ylli i Barcelonës udhëhoqi Brazilin drejt fazës gjysmëfinale në Olimpiadën e shtëpisë.
Selecao triumfoi me shifrat 2-0 në cerekfinale përballë Kolumbisë dhe tashmë do të masë forcat në gjysmëfinalet e turneut me Hondurasin që pas Argjentinës eliminoi edhe Korenë e Jugut. Në Arena Corinthians në Sao Paulo ishte mbrëmja e Neymar Jr. 24-vjecari justifikoi faktin që mban në krah shiritin e kapitenit të një kombëtareje që ka fituar 5 Kupa Bote por që në një Olimpiadë kërkon arin e parë duke i dhënë avantazhin Brazilit pas vetëm 12 minutash lojë. Fantastik Neymar, ylli i Barcelonës ekzekutoi në mënyrë perfekte një goditje standarte nga një distancë e largët duke e ndalur topin në fundin e rrjetës.
Në avantazh 1-0 skuadra e Rogerio Micales e kishte më të thjeshtë të kishte kontrollin e lojës dhe të administronte rezultatin. Los Cafeteros u përpoqën në disa momente të barazonin ndeshjen por Teofilo Gutierrez dhe Pabon Rios nuk ishin të saktë në finalizim. Për të vulosur kualifikimin e Brazilit në gjysmëfinale dhe njëkohësisht eliminimin e Kolumbisë mendoi Luan që i shërbyer nga Neymar lëshoi një predhë nga distanca duke shtangur për herë të dytë në këtë ndeshje poriterin e miqëve Bonilla. Një gol i Elis në minutën e 59-të i dha fitoren 1-0 Hondurasit ndaj Koresë së Jugut. Në gjysmëfinale u kualifikua dhe Nigeria që mundi 2-0 Danimarkën falë finalizimeve të kapitenit John Obi Mikel dhe Umar. Përfaqësuesja afrikane tashmë do të ketë përballë në gjysmëfinalet e Rio 2016, Gjermaninë.
