Ish-deputeti i Partisë Demokratike, Ervin Salianji, ndaj të cilit gjykata vendosi dje një vit burg, thotë se gjyqtari Alaudin Malaj që ka kërkuar lirimin e gazetarit Jetmir Olldashi në lidhje me të ashtuquajturën çështje “Babale-Xhafa”, është kërcënuar nga ajo që ai që e quan “Banda e ish ministrit të brendshëm”.
Salianji tregoi edhe shkresat e ku gjyqtari i Apelit të Tiranës, Alaudin Malaj ka kërkuar mbrojtje tek institucionet e shtetit.
“Gjyqtari i Apelit të Tiranës, Alaudin Malaj, ndihet i kërcënuar personalisht dhe familjarisht nga ajo që ai e konsideron si banda kriminale e Fatmir Xhafajt, ish-ministrit të Brendshëm.
Në një shkresë zyrtare drejtuar Këshillit të Lartë Gjyqësor në tetor 2019 ku kërkonte mbrojtje fizike, ish-kryetari i Gjykatës së Apelit të kryeqytetit prezanton detaje tronditëse se si, zyrtarë të lartë policorë, nën drejtimin e Xhafajt, i cili në atë kohë ishte Ministër i Brendshëm, i kanë ushtruar atij dhe familjarëve të tij të afërt presion kriminal”, tha ndër të tjera Salianji.
