Pas miratimit të paketës “anti-shpifje” dje në Kuvend, kanë reaguar zyrtarë të Partisë Popullore Europiane. Në një deklaratë për mediat, Koordinator i PPE-së për Punët e Jashtme, Michael Gahler dhe Raportuesi i PPE-së për Shqipërinë, David Lega shprehen se ligji është në kundërshtim të hapur me rekomandimet e vendeve ndërkombëtare.
Lega shprehet se votimi në parlament i paketës së qeverisë, “mund të ketë një ndikim negativ në hapjen e negociatave të anëtarësimit në BE për Shqipërinë”.
REAGIMET
Michael Gahler, Koordinator i PPE-së për Punët e Jashtme, deklaroi: “Ne vërejmë me shqetësim të thellë që shumica parlamentare e qeverisë shqiptare e udhëhequr nga Kryeministri socialist miratoi dy ligje për median dje në kundërshtim të hapur me rekomandimet specifike të bashkësisë ndërkombëtare. Komisioni Evropian, Këshilli i Evropës, si dhe media dhe organizatat shqiptare dhe ndërkombëtare të shoqërisë civile kishin shprehur kundërshtime të forta kundër këtyre ligjeve. Ne vërejmë se anëtari ynë i PPE-së, Partia Demokratike, shprehu rezistencë të fortë kundër miratimit të këtyre ligjeve dhe mbështet rekomandimet evropiane dhe ndërkombëtare”.
David Lega, Raportuesi i PPE-së për Shqipërinë, u shpreh: “Liria e medias dhe e drejta e informacionit janë liritë themelore në Evropë dhe një pjesë e domosdoshme e kritereve të Kopenhagës për anëtarësimin në BE. Legjislacioni i miratuar kërcënon këto liri që janë fituar kohë më parë nga populli shqiptar. Media e lirë ka qenë një reporter i vazhdueshëm i abuzimit të pushtetit dhe ka ekspozuar shumë skandale të korrupsionit. Miratimi duhet të shihet si një kthim serioz për Shqipërinë në rrugën e saj drejt sundimit të ligjit dhe demokracisë. Ky vendim, siç e thamë publikisht përpara votimit, mund të ketë një ndikim negativ në hapjen e negociatave të anëtarësimit në BE për Shqipërinë – në të cilën Grupi i PPE beson fuqimisht. Ne i nxisim autoritetet shqiptare të rishqyrtojnë vendimin dhe ta kthejnë atë“.
