Qeveria e futbollit botëror dhe bordi ndërkombëtar i këtij sporti formalizuan një vendim historik në mars të këtij viti, për të mundësuar një eksperiment 2-vjeçar që lejon 4 zëvendësime gjatë lojës e cila shkon në shtesë.
Këto rregulla të reja mund t’i shohim gjatë ndeshjeve të “Rio 2016”, në çerekfinalet: Brazil-Kolumbi, Kore e Jugut-Honduras, Nigeri-Danimarkë dhe Portugali-Gjermani.
Kriteret janë mjaft të thjeshta: një zëvendësim i katërt është i lejuar vetëm nëse ndeshja do të shkojë në kohë shtesë, ndërsa FIFA ka vendosur që ky rregull të shkruhet në historinë e ndeshjeve të Lojërave Olimpike.
Në një studim të kryer para votimit më herët këtë vit, FIFA u konsultua me trajnerë dhe futbollistë të grupmoshave të ndryshme dhe zbuloi se 85% e tyre ishin në favor të këtij ndryshimi historik.
Votimi në Kardif më pas lejoi risitë që do të shihen këtë muaj. “Në dy dekadat e fundit ka patur disa ndryshime të rëndësishme në ligjet e këtij sporti dhe gjithçka për të lehtësuar futbollistët. Futja e një zëvendësimi të katërt në shtesë bëhet për të ruajtur shëndetin e lojtarëve, për të ngritur nivelin teknik dhe për t’i dhënë mundësi trajnerit të bëjë lëvizje taktike”, tha trajneri brazilian Carlos Alberto Parreira, pjesë e grupit teknik të studimit në Rio de Zhaneiro.
