Paris Saint-Germain e ka filluar sezonin e ri në kampionat me këmbën e duhur. Skuadra e Emery, në fakt, ka arritur të marrë tri pikët e para në sezonin 2016-17 të Ligue 1, pasi ka mundur në transfertë skuadrën e Bastia 1-0. Siç e tregon edhe rezultati, fitorja e parisienëve nuk ka qenë aspak e lehtë, me vendasit që janë treguar më të rrezikshëm në 45 minutat e para, ndërsa miqtë janë dukur pak të humbur në mungesë të Zlatan Ibrahimovic, i cili është larguar në fund të sezonit të kaluar, duke kaluar në Premier League te Manchester United.
Megjithatë, në pjesën e dytë kampionët në fuqi të Francës kanë rritur sulmet dhe kanë arritur të gjejnë golin e fitores me Kurzawa, i cili ka shënuar në minutën e 74-t pas një asisti të marrë nga Jese, blerja e fundit e PSG në këtë merkato të verës. Para këtij momenti takimi është ndërprerë për disa minuta për shkak se lojtari i miqve, Lucas Moura, është goditur nga tifozët e Bastia gjatë momentit të ekzekutimit të një goditje dënimi. Arbitri i takimit, Schneider, ka vendosur gjithsesi që ndeshja të vazhdojë. Përveç fitores, lajmit tjetër i mirë për parisienët ka qenë kthimi ne fushë i Marco Verratti-t, i cili nuk ka luajtur me ekipin që nga marsi i kaluar për shkak dëmtimi.
