Lindita Basha, një banore e Fushë-Mamurrësit ka rrëfyer historinë e saj sesi prej 18 ditësh jeton në çadër dhe është braktisur nga qeveria duke mos marrë asnjë ndihmë. Banesën e saj e ka dëmtuar tërmeti i 26 nëntorit dhe ajo shprehet se ka frikë të hyrë brenda në ndërtesë pasi rrezikon t’i bjerë tavani në kokë.
Lindita shprehet se nuk ka ardh as komisioni për ta verifiku ndërtesën e saj, dhe se është braktisur nga shteti, pasi emri i familjes së saj nuk ekziston askund për ndihma. “Familjes ngjitur ja çuan ndërsa mua jo” – deklaron Lindita gjatë videos ku tregon se familja e saj është e përbërë nga katër anëtarë pa asnjë të ardhur.
“Jam vet ii katërti dhe s’kena të ardhme kërrkundi. S’kam marrë asnjë ndihmë. Ju thash a kam emër dhe më thanë se ke emrin. Për dritat vijnë të parët te unë, ndërsa për ndihma nuk duket askush. Edi Rama erdhi pa nja 5 shtëpi iu çoi ndihma dhe iku kurse te unë s’ka ardh kurrkush me thanë nëse je gjaë a je vdek’. Nuk ka ardh asnji as komisioni me e verifiku.
Brenda s’rrihet. Kam frikë minutë-minutës të bjerë tavani poshtë. Kam vënë një hekur me mbajt tavanin mos ju bjerë poshtë se kam frikën e fëmijëve, pa iku jeta jonë. Zonën e kanë pa me Mamurras, me Laç me krejt veç tek unë s’ka ardh asnji. Pres të më sjellë ndihma ndikush por s’ka, shtëpisë tjetër ja çojnë, shtëpisë sime jo.” – shprehet Lindita Basha.
Historinë e saj e ka publikuar kreu i PD-së Lulzim Basha përmes një video në Facebook ku shkruan:
“Familja e Lindita Bashës në Fushë Mamurras , si shumë familje të prekura nga tërmeti në Durrës, Laç, Lezhë, Manzë, Ishëm është braktisur nga qeveria.
Çadra prej plasmasi ku familja e saj jeton, rrëzon propagandën dhe mashtrimin me 5 yje të Edi Ramës. Shteti është inekzistent për familjet si e Lindita Bashës.
3 javë pas tërmetit, edhe pse faza e emergjencës ka kaluar, askush nuk ka shkuar të vlerësojë dëmet e banesës së saj, e cila, pas tërmetit, është shndërruar në një rrezik për jetën e familjes së Lindita Bashës.
Dëshmia e një nëne të vuajtur dhe të braktisur nga qeveria, është pasqyra më e pastër e dështimit të Edi Ramës në menaxhimin e krizës pas tërmeti.” – shkruan kreu i opozitës.
