Ka nisur punimet Komisioni Parlamentar për Edukimin dhe Median ku të pranishëm kanë qenë edhe gazetarë e përfaqësues të grupeve të interesit mbi 2 projektligjet e Paketës Anti-shpifje të propozuar nga kryeministri Edi Rama.
Gazetari Artan Rama tha se vetërregullimi i medias nuk do të thotë ndëshkim, siç sipas tij, është thelbi i projektligjeve.
Sipas gazetarit, ndryshimet ligjore synojnë që qeveria të kontrollojë median.
“Qasja e projektligjit që kryeministri sjell, ai ehtë autori dhe kam përshtypjen është i vetmi ekspert, është ndëshkimi. Imazhi i keq. Vetërregullimi është një proces edukues që do kohë, por s’mund të ndodhë vetvetiu. Shoqëria ka disa mekanizma për ta bërë këtë edukim”, deklaroi Rama, i cili propozoi që të jetë Autoriteti i Medias AMA, që të bëjë vetërregullimin e medias, por pa ndëshkim.
“AMA të organizojë aktivitete dhe projekte në bashkëpunim me komunitetin”, tha ai.
“Cilat janë projektet që kanë zhvilluar AMA në lidhje me edukimin në fushën e medias? Cilat janë komunitete që AMA ka përshirë? Janë pothuajse inekzistenete dhe ajo çka propozohet është vetëm ndëshkimi”, deklaroi.
Siguria kombëtare
Gazetari u ndal te koncepti i sigurisë kombëtare në projektligj.
“Siguria Kombëtare garantohet vetëm nga një shtyp i lirë, ndërkohë ky projektligj kufizon lirinë e shtypit për shkak të sigurisë kombëtare. Në nenin 132 qeveria merr atributet për të përcaktuar si protektor i sigurisë kombëtare. Asnjë legjislacion dhe asnjë rrethanë ligjore si jep të drejtën qeverisë që të përcaktojnë si protektor i sigurisë kombëtare, këtë gjë e zgjidh vetëm gjykata. Po ju marr një rast. Nëse unë si gazetar falë një hulumtimi zbuloj se në Elbasan apo Gramsh një fabrikë municionesh tregton armë në një zonë ku zhvillohet një luftë, po themi në Gjeorgji. Dhe unë dua ta publikoj. Ndërkohë, ne jemi të vetëdijshëm që publikimi i këtij hulumtimi mund të cënojë marrëdhëniet e të paktën 3 apo 4 shteteve. Qeveria në bazë të këtij projektligji më thotë që unë nuk duhet ta publikoj këtë informacion, sepse cënohet siguria kombëtare. Unë po ju pyes juve, cili është vendimi i drejtë që duhet marrë në këtë rast? Duhet ta publikojmë informacionin dhe të themi që kemi të bëjmë me një trafik, me një qeveri mafioze e të tjera me radhë, apo të frikësohemi për faktin se po cënojmë sigurinë kombëtare, apo raportet midis dy apo tre shteteve. Këto janë gjëra që s’mund ti zgjidhë qeveria. Qeveria natyrisht mund të ketë një qëndrim të sajin por kurrsesi s’mund të marrë një vendim për këtë. Këtë e zgjidh gjykata. Dhe këto janë raste që janë zgjidhur shumë vite më parë nga demokracitë perëndimore”, u shpreh Rama.
“Po kapet media”
Gazetari foli edhe për deklaratat e kreut të qeverisë në lidhje me situatën e emergjencës.
“Kryeministri tha se ne duhet të luftojmë lajmet e rreme gjatë emergjencave. Gjatë fazës së emergjencës ajo që duhet të kontrollohet më shumë është qeveria dhe jo media. Ky ligj bën pikërisht të kundërtën. Detyra e medias është të kontrollojë qeverinë dhe kurrsesi qeveria-median”.
