Zëdhënësi i Policisë së Kosovës, Daut Hoxha ka konfirmuar se rreth orës 11:00, një person i dyshuar, ka gjuajtur me gurë në drejtim të ndërtesës së Qeverisë së Kosovës.
Hoxha ka thënë se nga sulmi janë shkaktuar dëme materiale. “Policia ka iniciuar rastin për ‘dëmtim apo asgjësim të pronës’ dhe është në kërkim të të dyshuarit”, thotë Hoxha.
Kamerat e KosovaPress kanë filmuar një xham të thyer në ndërtesën e Qeverisë, që supozohet të jetë bërë nga gurë të hedhur nga jashtë.
Ndërtesa e Kuvendit dhe ajo e Qeverisë janë duke u ruajtur nga policë të armatosur, të cilët po patrullojnë për rreth tyre.
Po sot paradite deputeti Driton Çaushi nga Lëvizja Vetëvendosje ka hedhur gazin lotsjellës në Komisionin për punë të Jashtme.
Pas debateve të ashpra, ka përshkallëzuar situata dhe nënkryetari i Vetëvendosjes ka hedhur gaz lotsjellës. Më pas ai është arrestuar nga policia.
