Nga Boldnews.al
Një trupë e madhe e Emergjencave Civile të Kosovës erdhi në Shqipëri që paraditen e djeshme në ndihmë, pas tërmetit të fortë që shkaktoi dhjetëra viktima dhe qindra të plasosur në Durrës dhe Thumanë.
Nuk ishin aty vetëm me zemër dhe shpirt, por me profesionalizëm të theksuar, me mjetet e duhura në ndërhyrje të tilla dhe me përgatitjen mbresëlënëse. Ata shpëtuan disa jetë nën rrënojat e pallateve dhe shtëpive të shembura.
Faleminderit Kosovë që dhe shembull me logjistikën e përkryer, profesionalizmin si e ku duhej të ndërhyhej për të ecur centimetër më centimetër deri pranë njerëzve që ende kërkonin ndihmë poshtë rrënojave. Për fatin tonë të keq, zbuluat edhe pafuqinë tonë dhe mungesën e theksuar të mjeteve logjistike për të reaguar në raste të tilla të fatkeqësive natyrore, me përmasa vërtetë të rënda.
Forcat sjarrfikëse shqiptare dallonin qartë me xhaketa të gjera, edhe ato të falura nga ndihmat gjermane para disa kohëve, pa dorashka, me kaska që u vinin vërdall kokës, me këpucë veshur jo në numrin e tyre dhe pa veshje speciale. Në një moment në mësditë pranë një pallati të rrënuar në Thumanë pati ndërprerje të kërkimit pasi nuk kishin një palë gërshërë speciale të të prerë hekura dhe thyer inerte. Nuk dispononin krik special që ngrejtë arkitrarë të qëndrueshëm për të ndërhyrë më në thellësi të rrënojave. Nuk kishin qoftë edhe një fibër optike që të vëzhgonin zona të caktuara nën rrënoja.
Me mbërritjen e forcave të emergjencave nga Kosova gjithçka ndryshoi. Të mirëorganizuar, profesionalisht në nivele mjaft të lartë. Mjetet e duhura me vete, sharra speciale me bateri që prisnin mbetje inertesh, fibra optike të posaçme që i kalonin në të çarat e rrënojave ku shihnin se ku mund të ndodheshin personat e mbetur. Në raste të mungesës së pamjes futën qentë nuhatës të stërvitur.
Po ne? Po zjarrfikësit tanë, po ushtarakët, oficerët e policisë dhe të ekipit të shpëtimit? Ishin aty me mish e me shpirt, me zemër të copëtuar nga dhimbja, por punonin pa u ndalur në çdo formë. Por të papajisur, të pa trajnuar, pa mbështetje. Për qen as që bëhet fjalë, sepse “qenëria” vjen nga lart, duke mos i pajisur këta heroj të vërtetë me mjetet e duhura, trajnimin dhe trajtimin e nevojshëm.
