Biznesmeni Fatmir Kuçi do të qëndrojë 30 ditë në burg. Kjo është kërkesa që prokuroria e Vlorës, ka paraqitur në Gjykatën e këtij qyteti, lidhur me rastin e arrestimit të biznesmenit.
Ky i fundit akuzohet për “Vrasje nga pakujdesia” dhe rrezikon që të dënohet nga gjobë deri në 5 vite burg, ndërkohë që ditën e sotme ka shfaqur probleme shëndetësore me zemrën.
Pas këtyre komplikacioneve, biznesmeni i “Victoria Invest” është shtruar në spital.
Pritet që dhe masa e sigurisë nesër ndaj tij të zhvillohet në ambientet e spitalit, për shkak të problemeve shëndetësore të biznesmenit nga Elbasani.
Biznesmeni akuzohet për vrasjen e turistit nga Rusia, Denis Kaiumov 43 vjeç, i cili u godit për vdekje nga helikat e motor skafit, ndërsa humbi jetën në spital disa minuta më vonë, pasi nuk mundi që të mbijetonte nga plagët e shumta që kishte në trup.
Gjatë pyetjes së tij prej prokurorëve biznesmeni nuk pranoi akuzën e vrasjes së pushuesit, por se e kishte gjetur rastësisht në atë gjendje. Pavarësisht kësaj prokuroria thotë se Kuçi është personi i dyshuar për ngjarjen.
Ndërkaq ky i fundit ka pohuar se pranë vendit ku ai ka gjetur turistin rus, kanë qenë edhe mjete të tjera duke lundruar në atë moment.
Ndërkaq prokuroria ka nisur veprimet e saj hetimore edhe ndaj punonjësve të stacionit të policisë kufitare në Himarë të dyshuar për shpërdorim detyre.
Prokuroria dyshon se punonjësit e policisë së stacionit kufitar të Himarës, kanë lejuar biznesmenin Fatmir Kuçi të lundrojë, ndonëse ai nuk kishte leje lundrimi në det.
Kjo leje lundrimi nuk i ishte dhënë këtij të fundit pasi nuk ka pasur të prerë siguracionin përkatëse të mjetit lundrues.
