Ministria e Arsimit ka vendosur të anulojë procesin mësimor edhe ditën e nesërme në të gjitha shkollat e vendit, kpshtet dhe çerdhet, publike e jo publike, si pasojë e situatës së krijuar nga tërmeti.
Urdhri është firmosur nga ministrja e Arsimit Besa Shahini.
Tërmeti shkatërrues që goditi vendin tonë orët e mëngjesit, ka shkaktuar të paktën 17 viktima, qindra të plagosur, persona ende nën rrënoja dhe dëme të konsiderueshme materiale.
“Jam e tronditur nga humbja e jetëve dhe lëndimet trupore që kanë pësuar qytetarët si pasojë e tërmetit, siç besoj është edhe e gjithë Shqipëria. Ndaj kemi vendosur që të pezullojmë mësimin në të gjitha shkollat, kopshtet dhe çerdhet e vendit (përfshirë jo-publiket) edhe ditën e nesërme (datë 27 Nëntor, 2019) në mënyrë që familjet të qëndrojnë së bashku dhe ta përballojnë situatën duke u solidarizuar me ata që u prekën më së shumti nga kjo tragjedi. Bëj me dije se ekipet tona po vijojnë ndërkohë me evidentimin e dëmeve materiale dhe hartimin e planit të masave për shkollat e dëmtuara. Gjej rastin të përcjell ngushëllimet më të sinqerta ndaj të gjitha familjeve që kanë humbur njerëzit e tyre të dashur, si dhe t’i uroj shërim sa më të shpejtë të gjithë të lënduarve”, shkroi ministrja e Arsimit Besa Shahini në FB.
