Pas Shqipërisë, lëkundje tërmeti janë ndjerë në Bosnje-Hercegovinë. Sipas raportimeve paraprake të Qendrës Europiane të Sizmologjisë, magnituda ka qenë 5.4.
Epiqendra ishte 9 km nga Blagaj pranë Mostarit, një destinacion turistik i vizituar rregullisht nga shqiptarët dhe 79 km nga kryeqyteti Sarajeva.
Sipas mediave lokale, lëkundjet janë ndjerë të forta duke krijuar panik te banorët.
Deri më tani nuk ka raportime për të lënduar apo dëme materiale.
Ndërkohë, nga mediat kroate raportohet se lëkundjet janë ndjerë dhe në Dubrovnik.
Në raportimet e mediave të Rajonit, përmendet edhe tërmeti shkatërrues që goditi vendin tonë duke shkaktuar të paktën 8 viktima, qindra të plagosur, persona ende nën rrënoja dhe dëme të konsiderueshme materiale.
