Gjatë natës së djeshme, është djegur makina e gjyqtarit të Shkodrës Andri Ymeri. Dyshohet se zjarrvënia ka qenë e qëllimshme.
Ngjarja ka ndodhur rreth orës 23:30, në afërsi të Kishës Franceskane në Shkodër dhe nga flakët e mëdha është djegur edhe një makinë tjetër e parkuar në afërsi të automjetetit të gjyqtarit.
Dyshohet se dy persona me motorra i kanë hedhur benzinë makinës së gjyqtarit dhe i kanë vënë zjarrin. Vetë Ymeri ka deklaruar para bluve se nuk ka asnjë ide kush mund ta ketë bërë këtë, pasi pretendon se nuk ka konflikte me asnjë person.
Ndërkohë policia ka nisur hetimet lidhur me këtë ngjarje .
Kujtojmë se Andri Ymeri ka qenë më parë kryetar i Gjykatës së Shkodrës, ndërsa tani mban postin e gjyqtarit në këtë gjykatë.
Njoftimi i policisë
Më datë 24.11.2019, rreth orës 23.20, në lagjen “Vasil Shanto”, Shkodër, në rrethana ende të paqarta ka rënë zjarr në dy mjete të parkuara tip Volkswagen në pronësi të shtetasit A. T. 50 vjeç, dhe në mjetin Mercedez-Benz, në pronësi të shtetasit A. Y. 40 vjeç, me detyrë Gjyqtar pranë Gjykatës Shkallës së parë Shkodër.
Si pasojë mjeti në pronësi të shtetasit A.T është djegur pjesërisht ndërsa mjeti në pronësi të shtetasit A.Y është djegur plotësisht.
Në lidhje me ngjarjen është ngritur një grup i posaçëm hetimor nën drejtimin e Prokurorisë së Rrethit Gjyqësor Shkodër, ku vijon punën për mbledhjen e provave me qëllim identifikimin dhe kapjen e autorëve pasi paraprakisht dyshohet si ngjarje e qëllimshme.
