Nga Klodian Tomorri
Ministri i Brendshëm shkarkon Drejtorin e Policisë Rrugore thjesht për show. Për të thënë që qeveria po vepron ndaj rritjes së aksidenteve. Problemi është se show nuk e zgjidh hallin dhe njerëzit po vdesin nëpër aksidente njësoj si në kohë lufte.
Vitin e kaluar, ministri i Transporteve tha se qeveria do ndryshojë filozofinë e investimeve në rrugë duke i dhënë më shumë prioritet sinjalistikës dhe sigurisë rrugore. Dhe kështu ndodhi. Qeveria uli fondet për ndërtim rrugësh të reja dhe rriti investimet për sinjalistikën dhe sigurinë rrugore.
Po tenderat e sinjalistikës u shndërruan në afera kriminale korruptive, ku një grusht kompanish në bashkëpunim me autoritetet kontraktuese vodhën miliona dollarë. Pak muaj më parë çështja u hetua nga Autoriteti i Konkurrencës, i cili deklaroi qartësisht se tenderat ishin të manipuluar, por ai ishte i pafuqishëm që të faktonte manipulimet.
Rezultati? Takspaguesit shqiptare paguan vjet dhjetëra milionë dollarë më shumë për sinjalistikën dhe sigurinë rrugore, por numri i të vdekurve nga aksidentet u rrit me 2.1 për qind. Por nuk mbaron këtu. Ky vit do jetë edhe më i tmerrshëm. Gjasat janë që 2016-a të shënojë rekordin më të zi të 25 viteve për vdekjet nga aksidentet.
Problemi me aksidentet është i thjeshtë. Nëse qeveria do ta kishte mendjen më shumë për të bërë punë, do kishin vdekur më pak njerëz. Por nëse fondet vidhen dhe policia rrugore shkrihet për show sa herë i teket ministrit sigurisht që njerëzit do të vazhdojnë të vdesin si në kohë lufte.
