Nga Klodian Tomorri
Taksimi selektiv është antikushtetues
Tentativa e Bashkisë së Tiranës për të taksuar qytetarët e rretheve të tjera që hyjnë në kryeqytet është një çmenduri antikushtetuese. Kjo është një taksë që çdo gjykatë ta rrezon poshtë brenda sekondës.
Oreksi i Lalit për të taksuar është gjithmonë i madh, por ka ca parime më të shenjta se sa uria e Bashkisë së Tiranës për taksa.
I pari është parimi i mosdiskriminimit. Qytetarët janë njësoj të barabartë para ligjit. Nuk ka taksë që vendoset për disa qytetarë dhe nuk vendoset për të tjerët. Ça emri do i vendosim kësaj takse? Taksa e provincialeve apo taksa e fshatarëve? Sepse nëse kalon kjo taksë, qeveria nesër mund të vejë një taksë për barkëmëdhenjtë, një taksë për njerëzit e gjatë, një tjetër për njerëzit e shkurtër e kështu me radhë. Këto shembuj banale janë për të treguar se çfarë çmendurie është ajo ide.
I dyta është parimi i përkatësisë. Tiranë, Durrësi dhe çdo qytet tjetër i Shqipërisë janë pronë e shqiptarëve. Nuk janë prone as e kryetarit të bashkisë, as e kryeministrit cilido qofte ai.
I treti, është parimi i rezidencialitetit që mishërohet në sistemin tonë tatimor, neni 7 i ligjit për tatimin mbi të ardhurat. Taksat paguhen atje ku je rezident. Ndaj kemi marrëveshje për eliminimin e taksimit të dyfishtë edhe me të huajt ne. Me mendjen e Bashkisë së Tiranës, ne duhet të na taksonin sa here që dalim jashtë shtetit shtetit, për pushime apo për halle. Vajte dy ditë për vizitë në Milano, paguaj taksë për pastrimin dhe gjelbërimin e Milanos.
Së fundmi, argumenti ekonomik. Edhe ky nuk qëndron. Pretendimi i Bashkisë së Tiranës se gjithë shqiptarët vijnë në Tiranë për të marrë shërbime duke shkaktuar kosto dhe duke mos paguar asgjë është i pavërtetë.
Ata qytetarë që vijnë në Tiranë, paguajnë taksë tek çdo mall apo shërbim që marrin në kryeqytet. Sepse bashkia takson çdo biznes ku ata blejnë apo marrin shërbime. Përtej kësaj, Tirana nuk u bë e mira e dheut as nga Bashkia as nga qeveria. Është konsensusi i të gjithë shqiptarëve për ta pranuar atë si kryeqytet, që ka zhvilluar ekonomikisht Tiranën dhe që rrjedhimisht mbush arkat e bashkisë me taksa.
