Gëzim Bala, pronari i një firme në Shkodër, është vënë në pranga pasi ishte në kërkim policor për veprat penale: “Prodhimi i kundërligjshëm i artikujve dhe mallrave industriale dhe ushqimore” dhe “Fshehja e të ardhurave”. Ai u ndalua nga shërbimet e Pikës Kufitare të Muriqanit, konfirmuan burime zyrtare nga policia këtë të martë.
“Nga specialistët e Seksionit për Hetimin e Krimeve Ekonomike e Financiare në DVP Shkodër u ndalua shtetasi në kërkim 61 vjeç, banues në lagjen ‘Ahmet Haxhija’, Shkodër”, njoftoi policia.
“Në lagjen ‘Skënderbeg’, në zonën industriale ish-fermentimi, në punishten e firmës së këtij shtetasi, më datë 16.10.2019 është konstatuar se prodhoheshin përsëri produkte të ndryshme ushqimore në kundërshtim me ligjin, edhe pse e kishte të ndaluar që nga data 28.03.2018 prodhimin e artikujve ushqimorë. Materialet iu referuan Prokurorisë pranë Gjykatës së Shkallës së Parë Shkodër, për veprat penale ‘Prodhimi i kundërligjshëm i artikujve dhe mallrave industriale dhe ushqimore’ dhe ‘Fshehja e të ardhurave'”, shtuan të njëjtat burime.
Veproi në kundërshtim me vendimin e AKU, në kërkim biznesmeni
