“Engjëjt janë larg” me regji të Gjergj Xhuvanit dhe “Home sweet home” me regji të Faton Bajraktarit, janë dy filmat që deri më tani duket se i plotësojnë disa prej kushteve për propozim për mundësinë e nominimit si filmi me i mirë i huaj në Akademinë “Oskar”.
Drejtori i Qendrës Kinematografike të Kosovës Arben Zharku ka thënë për KultPlus se deri në fund të shtatorit pritet të shfaqet edhe një film, por nuk dihet ende se a do të jetë pjesë e këtij propozimi. Zharku tha se deri tani kushtet që janë në “Oskar”, për filma në kategori të huaj i plotësojnë dy filmat e lartpërmendur, dhe sipas tij, është shumë i rëndësishëm fakti që ka filma serioze që po propozojne.
“Ne po supozojmë se këto kushte mund t’i plotësoje filmi “Home sweet home” dhe “Engjëjt janë larg”, megjithatë është çështje e tyre a duan ta dërgojnë apo jo. Mund të ketë dhe ndonjë film që do të shfaqet deri në fund të shtatorit”, tha Zharku .
