Çmimi i një fuçie naftë bruto ka zbritur nën kuotën e 40 dollarëve amerikanë në bursën e Nju Jorkut. Kjo nuk ndodhte që nga muaji prill i këtij viti dhe shpjegohet me shumë faktorë.
Gjatë qershorit, çmimi i “arit të zi” kishte shënuar shifra të larta, duke arritur dyfishin e çmimit të shkurtit, që ishte më i ulti në 12 vjetët e fundit, por më pas erdhi gradualisht duke humbur terren.
Ekonomia botërore duket se nuk po e rimerr veten në nivelet e para krizës, me një kërkesë të ulët, ndërkohë që prodhuesit në Shtetet e Bashkuara të Amerikës kanë shtuar nxjerrjet nga nëntoka.
Po kështu, prodhimi në Libi ka nisur të shtohet, pas rimarrjes graduale të një pjese të madhe të kontrollit të territorit nga qeveria, që lufton kundër forcave të ISIS-it. Eksporti këtu ka nisur të kryhet nga tre porte, deri tani të bllokuara.
