Qindra fansa iu drejtuan dje profilit të Ardit Gjebreas me një kërkesë të vetme: Të këndonte “Dimëroj” në festivalin e “Këngës Magjike.” Vjet solli “Kur them ajo” me Saimir Pirgun dhe parvjet “Për ty” me të bijën,” pse këtë vit të mos performojë një perlë nga “Projekti Jon?”
Kantautori dhe showman-i reagoi në foton e bombarduar me komente “Rikthe Dimëroj” përmes një komenti, sigurisht.
“Më bombarduat. Më vutë në pozitë të vështirë, por edhe më lumturuat. Në fakt, ky është një tast që kur shtypet – dhemb. Është ajo që më mungon më shumë, por përditshmëria më skllavëron me orët që nuk më dalin. Sidoqoftë, mua nuk më pëlqen të rikthehem te të dikurshmet pasi motivohem: Shih përpara! Dhe duke parë dëshirën tuaj për rikthim të paktën me një këngë, do e mendoj seriozisht dhe me dashuri, jo thjesht në kuadër të të dielës apo ‘Këngës Magjike,’ por enkas. Veç më jepni pak kohë. Xhan ju!”
