Nga Boldnews.al
Lobi shqiptar në Gjermani ka arritur një fitore të rëndësishme, pas ndërhyrjes së fuqishme diplomatike për të shmangur emërimin e një diplomati rus, ish-zyrtar i Shërbimeve Sekrete, për t’u emëruar si raportues i Këshillit të Europës për dialogun Kosovë-Serbi.
Falë një fushate të rëndësishme, grupimi shqiptar arriti të ndikonte në zgjedhjen e gjermanit Peter Beyer në postin e të Reporterit të Posaçëm të Këshillit të Europës për bisedimet Prishtinë-Beograd.
Beyer, një mbështetës i çështjes shqiptare në Ballkan, kandidoi për postin e Raportuesit përballë rusit Alexei Kondratiew dhe një diplomati hollandez.
Rivaliteti më i lartë ishte ndërmjeti diplomatit gjerman, Beyer, i mbështetur edhe nga lobet shqiptare në Gjermani, dhe rusit Kondratieë, i mbështetur fuqishëm nga lobet serbe dhe ruse në Berlin e Strasburg.
Në votimin e zhvilluar së fundmi, Asambleja e Këshillit të Europës votoi në shumicë absolute kandidaturën e Peter Beyer për të qenë Raportues për ecurinë e dialogut Prishtinë-Beograd. Diplomati gjerman Beyer fitoi me 33 vota, kundrejt 6 të diplomatit rus, Kondratieë.
Kandidimi i Alexei Kondratiew, një ish-agjent i shërbimit sekret rus, shkaktoi reagimin e fortë të diasporës shqiptare në Gjermani dhe në qendrën e Këshillit të Europës, në Strasburg.
Kondratiew, një ish-përfaqësues i Rusisë në Asamblenë e Përgjithshme të Këshillit të Europës, ka qenë më herët pjesë e shërbimit sekret rus, si edhe përfaqësues ushtarak i Moskës në Kosovë, gjatë periudhës 1999-2001.
Emërimi i mundshëm i tij si Raportues i Këshillit të Europës u pa me shqetësim edhe nga një prej gazetave më prestigjioze gjermane, “Bild”.
Pak ditë më parë, “Bild” e konsideronte “skandal” në rast se Këshilli i Europës përzgjidhje diplomatin rus, Kondratiew si përfaqësues në dialogun Kosovë-Serbi.
Sipas gazetës gjermane, Kondratiew nuk e ka mbajtur asnjëherë të fshehtë qasjen e tij pro-serbe. Ndaj, një emërim i mundshëm i tij, jo vetëm që mund të ndikonte negativisht në dialogun Prishtinë-Beograd, por nga ana tjetër do t’i vinte një pikëpyetje besueshmësisë së vetë Këshillit të Europës.
Megjithatë, falë fushatës pro-Peter Beyer, ku u përfshinë fuqishëm edhe anëtarët e lobit shqiptar në kryeqytetin gjerman dhe në selinë e Këshillit të Europës, u arrit shmangia e emërimit të diplomatit dhe ish-agjentit sekret rus, Kondratiew, në dialogun Kosovë-Serbi.
