“Zonja Arta Vorpsi automatikisht është zgjedhur anëtare e Gjykatës Kushtetuese”, deklaroi kreu i Kuvendit Gramoz Ruçi në seancën e fundit plenare.
Por Kreu i Shtetit e intepreton ndryshe ligjin për Kushtetuesen. Kishte premtuar që 24 orë pas votimit nga ana e Parlamentit , do të dekretontë vakancen e dytë.
Për shkak të axhendës së tij në Samitin e Paqes në Francë, me të ardhur në aeroportin e Rinasit, Kreu i Shtetit firmosi emrin e Marsida Xaferllarit, si anëtarë të 5 të të Gjykatës Kushtetuese.
Në orën 20:00 Presidenti i Republikës do të argumentojë edhe dekretin e tij, pasi tashmë jemi përballë faktit që për të njëjtën vakancë janë dy emra, Arta Vorpsi dhe Marsida Xhaferllari.
Sipas ligjit për organizimin dhe funksionimin e Gjykatës Kushtetuese, Kreu i Shtetit ka 30 ditë kohë nga paraqitja e kandidatëve të KED të shprehet me dekret.
Por presidenca përmes një shkrese zyrtare ka nënvizuar se pas zgjedhjes së emrit të parë, që ishte Besnik Muçi, rradha për votim i kalonte Parlamentit dhe më pas sërish Presidentit. Në të kundërt, për kreun e Kuvendit ligji është i qartë, në Kushtetuese emërohet automatikisht kandidati i parë i listës.
Por kësaj situatë interpretimi të ligjit i është bashkangjitur edhe KED, institucion që ende nuk e ka publikuar emrin e Vorpsit në faqen zyrtare.
Me Marsida Xhaferllarin dhe Arta Vorpsin për të njëjtën vakancë, Gjykata Kushtetuese shkon në 5 anëtarë.
Elsa Toska dhe Fiona Papjorgji të zgjedhur nga Parlamenti janë pritje të thirrjes së Presidentit për të bërë betimin dhe për të nisur zyrtarisht punën si gjyqtarë në Kushtetuese.
DEKRETI
“PËR EMËRIMIN E GJYQTARIT TË GJYKATËS KUSHTETUESE”
Në mbështetje të neneve 93, 125 pikat 1 e 3, 129, 149/d pika 1, 179 pikat 2 e 12, të Kushtetutës së Republikës së Shqipërisë, neneve 7, 7/a pika 4, 7/b, 8 dhe 86 pika 4, shkronja “c” të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, pasi administrova “Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre për plotësimin e vendit vakant në Gjykatën Kushtetuese (vakancë e plotë) e shpallur nga Presidenti i Republikës me dekretin nr. 11133, datë 04.03.2019”, akte këto të miratuara nga Këshilli i Emërimeve në Drejtësi me vendimet nr.132, datë 21.09.2019 dhe 133, datë 21.09.2019; pasi u njoha me të gjithë praktikën dokumentare të vendimmarrjes dhe vlerësimit të Këshillit të Emërimeve në Drejtësi për kandidatët e ngelur në garë për plotësimin e kësaj vakance, përcjellë fillimisht nga Këshilli i Emërimeve në Drejtësi me shkresën nr. 553 prot., datë 08.10.2019 dhe plotësuar përfundimisht me shkresën e këtij organi me nr.714 prot, datë 07.11.2019; si dhe pasi vlerësova kandidatët e ngelur në garë për plotësimin e kësaj vakance, pas zgjedhjes nga Kuvendi në datën 11.11.2019, të dy anëtarëve të Gjykatës Kushtetuese, në përfundim vendosa të,
D e k r e t o j;
Neni 1
Zonja Marsida Xhaferllari emërohet gjyqtar i Gjykatës Kushtetuese.
Neni 2
Ky dekret hyn në fuqi menjëherë.
Nr. Dekretit 11350
Tiranë, më 13.11.2019
PRESIDENTI I REPUBLIKËS
ILIR META
