Kosova luan një ndeshje shumë të rëndësishme në transfertë ndaj Republikës Ceke.
Rezultati në këtë takim do të jetë vendimtar për kualifikimin e mundshëm në Europian.
Milot Rashica, është një nga lojtarët më të rëndësishëm të Kosovës dhe në konferencën e tij para ndeshjes, ai prek një sërë temash për sa i përket ndeshjes, duke deklaruar:
“Të gjithë e dimë që është ndeshja më e rëndësishme. Çdo ndeshje deri tani e ka pasur rëndësinë e vet, po kjo është finale për ne. Po mendojmë vetëm për Çekinë, të shkojmë atje e të marrim rezultat pozitiv, nuk kemi çfarë të humbim, do të kërkojmë ta fitojmë ndeshjen”.
“Muriqi do të jetë një mungesë e madhe për ne, duke ditur formën që ka pasur deri tani. Por nuk kemi çfarë t’i bëjmë, futbolli i ka këto. Edhe në ndeshje të tjera na kanë munguar lojtarë, por ka pasur rezultate pozitive. Ne duhet të fitojmë për të gjithë që mungojnë, për shtetin tonë, duhet të japim maksimumin.”
Gjithashtu Rashica thekson se vetia më e rëndësishme që ka ekipi është loja në grup dhe sakrifica për njëri-tjetrin.
“Në shumicën e ndeshjeve luaj aty. Nuk e di me çfarë formacioni do të luajmë, kemi edhe pak kohë për të vendosur e të shohim si do të vendosë trajneri. Kemi lojtarë të tjerë që luajnë në pozita të ndryshme, por ajo që na ka sjellë deri këtu është grupi, kemi luajtur për njëri-tjetrin. Kemi pika të forta në shumë vende. Kur luajmë si grup, mund të ndodhë kjo. Nëse diçka na ka sjellë këtu, kemi lojtarë që mund të luajnë në pozita të ndryshme”.
Kosova bën pjesë në grupin A, dhe gjendet në vendin e tretë me 11 pikë të grumbulluara, vendin e parë e mban Anglia në kuotën e 15 pikëve, dhe në vend të dytë Republika Çeke, në kuotën e 12 pikëve.
