Familja Kapedani ka rimarrë ish- vilën e Enver Hoxhës falë vendimit të Gjykatës së Apelit të Durrësit. Duket se kanë përfunduar seancat e gjata për kthimin e ish vilës së Enver Hoxhës pronarëve të vet. Kështu përveç familjes Kapedani ishin dhe dy palë të tjera, njëra prej së cilës ishte ambasada serbe.
Gjykata e Apelit në Durrës vendosi që ish- vila e Enver Hoxhës e cila ndodhet në rezidencën qeveritare në plazhin e Durrësit ti jepet familjes Kapedani. Trupi gjykues me relatore Meriban Mullajn ka dhënë vendimin lidhur me pronësinë e ish vilës së diktatorit Enver Hoxha të cilën ja ka njohur familjes Kapedani në Durrës.
Kishte kohë që kjo vilë kërkohej të kalonte në pronësinë e familjes Kapedani, Ambasadës serbe në Tiranë si dhe në probësinë e Drejtorisë së Shërbimeve Qeveritare. Pas shumë seancash të shtyra,më në fund në seancën e djeshme janë dëgjuar ekspertët e thirrur si nga trupi gjykues ashtu edhe nga palët e interesuara të cilët sollën fakte lidhur me trajektoren që kishte kaluar pronësia e kësaj vile që nga momenti i ndërtimit të saj deri më sot.
Vila u ndërtua nga familja Kapedani në fillim të viteve ’30 dhe në vitin 1936 ju shit ambasadës serbe në Tiranë.Në vitin 1945 vila u sekuestrua nga qeveria komuniste që sapo kishte ardhur në pushtet dhe i kaloi Drejtorisë së Shërbimeve Qeveritare.Deri në vitin 1991 ajo u përdor nga familja e Enver Hoxhës .
Pas ndryshimeve politike vila u kërkua të merrej nga familja Kapedani e cila pretendonte pronësinë mbi të e po kështu atë e kërkonin edhe ambasada serbe si dhe drejtoria e shërbimeve qeveritare.Në këto kushte cështja u kalua për gjykim.Disa muaj më parë dy shkallët e gjykatave ja kishin njohur këtë pronë familjes Kapedani por Gjykata e Lartë e dërgoi atë për rigjykim në Apel.Kjo e fundit kërkoi mendimin e ekspertëve për të vërtetuar aktin e shitblerjes së vilës në vitin 1936. Edhe pse në sallën e gjyqit u paraqit i transkriptuar akti i shitblerjes së vilës, trupi gjykues vendosi tia japë atë familjes Kapedani.
Nga ana e tyre avokatët e palës serbe si dhe ata që përfaqësonin Drejtorinë e Shërbimeve Qeveritare u shprehën se do të bëjnë rekurs në Gjykatën e Lartë menjëherë sapo zbardhet vendimi i gjykatës së apelit.Kjo kërkon 3 javë,bëjnë me dije avokatët.
