Nga Boldnews.al
Partia është në festë. Flamujtë e kongresit po mbahen lart e më lart, ndërsa në podium dalin njëri pas tjetrit disa nga drejtuesit e Partisë Socialiste në letra, por të konceptit Rilindje. Po zgjidhen delegatët e rinj dhe drejtuesit e PS-ve në rrethe. Fjalim mbajtësit brohorasin deri në çjerrje për suksese imagjinare, që në gjashtë vite qeverisje sipas tyre është transformuar vendi në zhvillim marramendës ekonomik, rend, barazi para ligjit, demokraci shtetërore dhe të brendshme partiake.
Përveç talljeve të tilla therëse, ka edhe një ndryshim të madh të konceptit të drejtimit të partisë. Ideja brilante ishte e Ramës, si gjithnjë. Në çdo strukturë të PS-ve lokale, do të drejtojë një burrë dhe një grua si bashkëkryetarë. Ovacione të mëdha… Por kjo është vetëm pjesa e dukshme, pasi Rilindja nuk mund të drejtohet vetëm nga një burrë dhe grua. Sot partia duhet që në krahët e tyre të vendosë edhe një kriminel. Në letra ai nuk ka ndonjë post, por harton politikat si duhet të qeveriset, thur planet për pastrim parash, ndërton kulla, bën afera dhe në fund pretendon të jetë edhe drejtues. Mundësisht ndonjë vend në bashki, prokurime, dogana, tatime apo porte.
Në gjashtë vite qeverisje është fakt se ka pasur arritje të pamohueshme në shkatërrimin e konceptit shtet dhe afrimin e krimit me politikën, ku kjo e fundit është ombrella më e mirë që i ligu, ligjshkelësi, trafikanti i vajzave, bosi i drogës apo grabitësit e armatosur, të heqin uniformën e burgut dhe veshin atë të Rilindasit, edhe me poste. I janë futur politikës dhe për këtë kategori gjithnjë ka një vend në administratën e lartë shtetërore, madje edhe në Parlament apo në krye të bashkive të vendit.
Me qeverisjen gjashtë vjeçare të Rilindjes së Edi Ramës, është arritur që krimi i organizuar të kanalizohet në një drejtim, ku është vetë deputeti me të shkuar dhe tashme të errët në raport me ligjin, biri i tij, kushëriri i ministrit, vëllai, krushku, kunati dhe farefisi bashkë. Nëse pas çdo organizate kriminale do të kërkohet një lidhje, fijet të çojnë vetëm në një drejtim; pushtetin e sotëm.
Mund të duket ironike, madje edhe djallëzore si analizë, por kjo është arritje e vërtetë. Krimi i organizuar nuk është i shpërndarë, ai gjendet bash e në qeverisje të të gjitha niveleve. Padiskutim që kjo është “meritë” e pamohueshme e kryeministrit Rama. Diti ti mbledhë kudo që ndodheshin, i përzgjodhi, u dha meritën gjithsecilit, në fillim u afruan pranë partisë edhe ca kriminelë ordinerë, por shpejt i skualifikuan, pasi kriteret e qeverisë ishin të forta: e kalojnë testin vetëm trafikantët me emër, kriminelët me damkë dhe biznesmenët oligarkë.
Që nga momenti i hyrjes në fuqi të ligjit të dekriminalizimit në vitin 2016 dhe deri më tani janë mbi 120 zyrtarë të lartë të larguar, në mbi 90 % të tyre përfaqësues të Partisë Socialiste. Megjithatë kjo nuk i ndal, u ikën disa burra të vërtetë të botës së krimit, por ka vend për të gjithë të tjerët, ndaj edhe kur është i vetëm në zgjedhje, me fitore ende pa nisur gara, Rama sërish vendos në krye të bashkive personazhe nga bota e trafikut, grabitjes dhe falsifikimit.
Kreu i qeverisë nuk ka faj në këtë drejtim. Jo se ai dëshiron ti afishojë, por sot branda partisë nuk po gjen dot qytetarë të ndërshëm, individë të shkolluar dhe intelektualë në fushat e tyre. Në fakt ka plot, por nuk e kanë vendin në Rilindje, sepse paria nuk i afron në parti.
Në takimin e PS-së në Tiranë ditën e sotme për përcaktimin e delegatëve të Kongresit, me moton ‘Ti zgjedh’, ministrja simbol i qeverisë, Elisa Spiropali u shpreh se ndihet krenare për qeverisjen e PS-së në 6 vite. Me gjestikulacione duarsh, përmallim dhe tonacion prej “liderje”, Spiropali tha se PS zgjodhi rrugën e transformimit të drejtësisë dhe përgjegjshmërisë.
“Shihni Tiranën, ndryshimin që i ka ndodhur, njësoj si qytetet evropiane. Ashtu e dhe Kavajën, së shpejti edhe Kamzën. Duhet t’i themi këto me zë të lartë sepse në 30 qershor nuk votuam vetëm për kryebashkiakët , por për të thënë që Shqipëria është shtet dhe askush nuk e merr dot peng, dhe këtë e bënë socialistët. Prandaj BE dhe SHBA vazhdojnë të na mbështesë. Që prej shtatorit ne nisëm procesin e vitalizimit të PS në çdo qelizë”, tha ajo.
Padyshim ovacione, trokitje duarsh sa pëllëmbët të bëhen flakë. Partia po zgjedh, një burrë, një grua dhe një kriminel… Fjala kriminel nuk ka detyrimisht konotacion negativ, përkundrazi, brenda Rilindjes ajo është meritë. Ata po zgjedhin, qytetarët shohin, por sido të që të shkojë situata në vend, nëse ndonjë ditë do kërkohen kokat e krimit të organizuar që kanë filluar sportin e ri të grabitjes së pronës publike dhe private është e lehtë pur tu gjetur… Rilindja i ka grupuar!
