Policia e Korçës ka arrestuar 54 – vjeccarin në fshatin Drenovë pasi u vetëplagos me armë zjarri, e cila iu gjet e sekuestrua në banesë.
Arrestimi i Dhimitraq Bello u bë pasi, ky shtetas dje në banesë, është vetëplagosur aksidentalisht, në këmbë, me një armë zjarri pistoletë , tip “Zastava” e kalibrit 7.65 mm, të cilën ky shtetas e dispononte pa lejën e organeve kompetente, së bashku me 3 (tre) fishekë si edhe 1 (një) gëzhojë, të kalibrit 7.65 mm, të cilat iu gjetën dhe sekuestruan me cilësinë e provës materiale, gjatë kontrollit të ushtruar nga Shërbimet e Policisë, në banesën e këtij të fundit.
Pas marrjes të ndihmës mjekësore, në Spitalin Rajonal të Korçës, Dhimitraq Bello, u dërgua për mjekim më të specializuar në Spitalin Ushtarak në Tiranë.
Materialet për hetime të mëtejshme, i kaluan Prokurorisë të Rrethit Gjyqësor Korçë, për veprën penale: “Prodhimi dhe mbajtja pa leje e armëve luftarake dhe e municionit” parashikuar nga neni 278/2 i Kodit Penal.
