Lady Gaga duket se nuk ka ndërmend të ndalet në rrugëtimin e saj si aktore. Pas filmit të suksesshëm “A Star is Born”, këngëtarja do të shfaqet në ekranin e madh me filmin e regjisorit Ridley Scott, që trajton vrasjen e ikonës së modës Maurizio Gucci.
Gaga do të luajë rolin e ish-gruas së stilistit, Patrizia Reggiani, e cila u shpall fajtore për krimin. CNN shkruan se xhirimet pritet të fillojnë së shpejti. Skenari i filmit bazohet në librin e shkrimtares Sara Gay Forden, “Shtëpia Gucci: Një histori sensacionale e vrasjes, çmendurisë, magjepsjes dhe lakmisë”.
Risjellim në vëmendje se Maurizio ishte drejtuesi i shtëpisë së modës “Gucci”, para se të vritej në zyrën e tij në vitin 1995.
