Një 37-vjeçar shqiptar është plagosur nga një bashkatdhetar 45-vjeçar mëngjesin e së dielës në Greqi, raportuan mediat lokale.
Sipas të njëjtave burime, të dy kishin shkuar për gjah në zonën e Mikro Perivolaki-t.
Aty, në rrethana që mbeten ende për tu zbardhur nga hetimet, 37-vjeçari është qëlluar në kokë me armë gjahu. Një plumb e ka prekur në anën e majtë të kokës sipër veshit. I lënduari është transportuar në spitalin e Volosit dhe raportohet se ndodhet në gjendje të rëndë shëndetësore.
Ndërkohë, shqiptari që shkrepi këmbëzën e armës është shoqëruar në polici. Ndaj tij nisi një procedim penal në gjendje të lirë. Dyshimet janë se plagosja ka ndodhur aksidentalisht.
Gjeneralitetet e protagonistëve të ngjarjes nuk bëhen me dije nga raportimet e mediave greke.
