75-vjetori i çlirimit të Tiranës ka hapur një dabat në publik lidhur me posterat e personazheve që ka vendosur bashkia e Tiranës në bulevardin kryesor të kryeqytetit.
Në lidhje me këtë ka reaguar dhe kleriku i kishës katolike në Tiranë Dom Artur Jaku i cili deklaron se në të njëjtin vend ku u nderuan klerikët e dënuar e pushkatuar nga regjimi komunist, po nderohen edhe figura për të cilat historianët kanë dyshime e dokumente që tregojnë se kanë marrë pjesë në këto masakra.
Nga Dom Artur Jaku
Do të ishte vërtetë e trishtë dhe dëshpëruese, që në të njëjtin vend ku u nderuan klerikët e dënuar e pushkatuar nga regjimi komunist, të nderoheshin edhe figura për të cilat historianët kanë dyshime e dokumente që tregojnë se kanë marrë pjesë në këto masakra.
Kisha, shpalli si fillim, lumnimin e vetëm 38 martirëve, vetëm e vetëm, se nuk arriti të shoshiste e dokumentonte katërcipërisht, historitë e emrave të tjerë që humbën jetën gjatë regjimit dhe prej regjimit. Pikërisht për të mos fyer disa figura, në mesin e tyre, përkrah tyre dhe si ata, nuk duhen nderuar të tjerë.
Do të ishte ende më e trishtë, që 75 vite pas luftës, të vinim përkrah ata që vërtetë dhanë jetën për atdhe, me ata që vranë shqiptarë të tjerë në rrethana të paqarta.
Nuk mundemi më t’i nderojmë të gjithë, duhet tashmë të dimë para kujt të përulemi.
Dhe mos të harrojmë, sic thoshte Molier:
“Nuk është faj i madh të mos dish të vërtetën, por është faj i madh ta përbuzësh pasi ta kesh mësuar”.
