Pasditen e kësaj të shtune janë luajtur dy ndeshje të javës së 11-të të Kategorisë Superiore, Teuta-Tirana në Durrës dhe Skënderbeu-Laçi në Korçë.
Në supersfidën e luajtur në qytetin bregdetar, gjithçka përfundoi në barazim 1-1, me durrsakët që barazuan në fund të takimit dhe kryqytetasit që e mbyllën ndeshjen me 9 lojtarë.
Fillimisht ishte Ngo i cili do të kalonte Tiranën në avantazh që në fraksionin e parë të lojës në minutën e 18′. Por në të 81′ do të ishte Rustem Hoxha që do të çonte gjithçka në baraspeshë. Në këtë takim Tirana mori dhe dy kartona të kuq: Hoxhallari në minutën 76′ (2V) dhe Torasa në minutën e 93′ (2V).
Pas kësaj ndeshjeje, Tirana e gjen veten me 18 pikë, momentalisht në vendin e parë. Në kuotën e 17 pikëve Teuta, që mban vendin e katërt.
Sfida e luajtur në Korçë dhuroi dhe ajo spektakël. Laçi tani merret frymë ndryshe! Me ardhjen e Cungut në stol, kurbinasit po luajnë krejt ndryshe dhe sot morën fitoren e tretë radhazi duke mposhtur me përmbysje 4-1 Skënderbeun në transfertë.
Pjesa e parë foli për bardhekuqtë, por në të dytën fusha foli për skuadrën e drejtuar nga tekniku shkodran, i cili ka pasuar profesor Starovën. Lushkja, Nwabueze (2) dhe Xhixha ishin ata që shënuan për kurbinasit, ndërsa për Skënderbeun shënoi Gripshi një supergol.
