Nga Boldnews.al
Nuk po gjejnë karar drejtorët e Rilindjes së kryeministrit Edi Rama. Pak muaj në detyra të rëndësishme dhe në fund drejtorët ikin më dorëheqje, hiqen me bujë, apo largohen butë për ti lënë radhën dikujt tjetër, të besuarit të kryeministrit apo ministrit të linjës. Vijnë me premtime të mëdha, por ikin me barrën e rëndë të trafikut të drogës që gjallon në porte, gropës së zezë që thith kontrabanda në dogana, apo shifrat e çmendura të evazionit fiskal që pjellin tatim-taksat.
Më i fundit drejtor i madh i larguar është Arlind Gjokutaj, i cili prej shtatë muajsh ishte në krye të Drejtorisë së Përgjithshme të Doganave. Shifrat e tmerrshme të mosrealizimit të të ardhurave, por edhe dyshimet se trau i kontrabëndës ulej e ngrihej për oligarkët si kolovajzet e fëmijëve, çuan Gjokutajn drejt dorëheqjes, sigurisht të detyruar.
Një forcë më e madhe se ai nuk e linte të bënte detyrën, pasi burime konfidenciale shprehen se Gjokutaj ka pasur trysni në kryerjen e detyrës. Në vendin e tij është emëruar zëvëndësdrejtori Gjon Bardhi, ku edhe ai si numri dy duhet të mbante përgjegjësi për këtë dështim, por Rilindja nuk njeh kufi.
Vetëm për nëntë muajt e parë të këtij viti realizimi i të ardhurave nga Doganat ka njohur ulje, duke qenë në shifrat 4 për qind më pak se planifikimi. E njëjta situatë është edhe tek Tatim-Taksat që kanë ndërruar katër drejtues që vijnë me bujë si “shpëtimtarë” të arkës së shtetit dhe largohen duke thelluar grupën e mungesë së të ardhurave.
Kontrabanda në dogana dhe evazioni fiskal në tatime ka “shqetësuar” parinë drejtuese të qeverisë e cila tashmë nuk ka para për të paguar oligarkët. Konçensionet në shëndetësi, inftrastrukturë rrugore apo inceneratorët, janë kthyer në thithësen e parasë publike ku bëhet fjalë për rreth dy miliardë euro investime e fitime, të cilët përfundojnë në duart e pesë biznesmenëve.
Nga ana tjetër, në Portin e Durrësit vetëm pak ditë më parë Drejtor i Përgjithshëm Ekzekutiv i Autoritetit Portual Durrës Agron Tare dha dorëheqjen. Edhe pse në facebook mburrej për arritjet, duket se situata nuk është aq rozë sa e paraqet propaganda e qeverisë.
Ai erdhi në këtë post në janar të këtij viti, pasi u largua pasardhësi Afrim Bakaj. Të mendohet se brenda një viti ikin tre drejtorë dhe jo pa shkak. Shqipëria tashmë është futur në listën e sterrosur të vendeve ku po trafikohet tranziti i kokainës në sasi të mëdha. Një prej “hambarëve” që mban pluhurin çudibërës dhe fitimprurës të bandave me lidhje të forta politike është edhe Porti i Durrësit.
Prej aty pritej një ngarkesë më e fundit prej 137 kilogranmë kokainë, por pala greke e instruktuar me të drejtë nga DEA amerikane, e kishte hequr lëndën narkotike nga ngarkesa në Portin e Pireut, pasi nuk kishte besim se autoritetet shqiptare do e bënin detyrën që u takonte; arrestimi i trafikantëve dhe sekuestrimi i drogës. Në fakt atyre u doli kjo “profeci”, pasi edhe në pakot e mbushura me oriz në vend të drogës, erdhën për ti marrë një peshkatar dhe një roje porti. Bosat e mëdhenj as nuk janë identifikuar, jo më të shpallur në kërkim.
Nuk është më aspak hipërbolë që Porti i Durrësit është kthyer në një magazinë të madhe të drogës. Në kontenierët që mbërrijnë nga vendet e Amerikaës Latinë me “fruta ekzotike”, futet kokainë në sasi të mëdha. Gjithashtu, si çuditërisht edhe kanabisi u ikën nuhatjes së qenve antidrogë, apo skanimit dhe kontrolleve policore.
