Presidenti i Parlamentit Europian David Sassoli do të mbajë një vizitë zyrtare në Shqipëri.
Mësohet se Sassoli do të vijë në Tiranë në datat 2 dhe 3 nëntor, ndërsa në datën 4 do të vizitojë Maqedoninë e Veriut.
Në një dalje për mediat, presidenti i PE tha se Shqipëria dhe Maqedonia e Veriut i bënë reformat që i kërkuan dhe duhet të shpërblehen për përpjekjen e jashtëzakonshme. Sassoli kërkoi që Shqipëria dhe Maqedonia e Veriut të vazhdojnë me reformat dhe të mos dorëzohen.
“Vizita në Maqedoninë e Veriut dhe shumë shpejt në Shqipëri, ka rëndësi të madhe personale për mua në këtë moment. Ne e dimë se popujtë e të dy vendeve janë të zhgënjyer thellë me dështimin e Këshillit për të aprovuar çeljen e negociatave për shkak të vetos nga shumë pak vende anëtare. Ne e kuptojmë dhe ndajmë këtë zhgënjim. Shqipëria dhe Maqedonia e Veriut kanë përmbushur reformat që ne iu kërkuam dhe tani meritojnë shpërblim për mundimin e jashtëzakonshëm. Dhe për më shumë, dua t’ju jap një thirrje qytetarëve dhe sidomos të rinjve: Mos u dorëzoni, ju lutem qëndroni në itinerarin evropian. Parlamenti Evropian është me ju. Me shumicë votash, Parlamenti Evropian me mbështetje maksimale do të rihapë procesin për Shqipërinë dhe Maqedoninë. Ne nuk do të qëndrojmë në heshtje, por do të veprojmë me urgjencë që KE të marrë një vendim unanim në favor të hapjes së bisedimeve në takimin e ardhshme. Deri atëherë, inkurajojmë të dy vendet të vazhdojnë me reformat. Ne jemi të bindur, se pavarësisht kësaj shtyrjeje, koha nuk është e humbur. Reformat që janë zhvilluar në rrugën për t’u bërë pjesë e unionin janë në të mirë të të dy vendeve dhe qytetarëve të tyre, por sidomos për të rinjtë që meritojnë një të ardhme më të mirë”, shprehet Presidenti i PE.
