Në fillim të kësaj jave, tre persona kanë vdekur nga shiu i madh që përmbyti qytete dhe fshatra në jug të Francës.
Një grua 68-vjeçare britanike, vdiq pasi u përfshi nga ujërat, gjatë përmbytjes që ndodhi jashtë shtëpisë së saj në Cazouls’d-Herault, që ndodhet rreth 30 milje në perëndim të Montpellier, raporton FoxNews.
Ajo u trasportua për në spital të mërkurën, pasi u zbulua nga punonjësit e urgjencës që ndodheshin pranë saj, sipas mediave lokale.
Detajet e dy vdekjeve të tjera të lidhura me përmbytjet në Francë janë të panjohura për momentin.
“Ne po mbështesim familjen e një gruaje britanike, që ka vdekur në Cazouls-d’Herault dhe stafi ynë është në kontakt me autoritetet franceze,” tha një zëdhënës i Zyrës së Jashtme.
Ministria e Brendshme e Francës thotë se mbi 2,000 punonjës të urgjencës janë thirrur të ndihmojnë, pas shiut ekstrem dhe përmbytjeve që depërtuan përmes tetë qarqeve, përgjatë Mesdheut dhe zonave të brendshme të Francës.
Qyteti i Beziers,18 milje në perëndim të Cazouls-d’Herault, ishte ndër më të goditurit nga stuhitë ditët e fundit, duke evakuuar dhjetëra persona.
Përmbytja e fuqishme, ishte në gjendje të lëvizte blloqet e betonit.
Një banor tha se ata kurrë nuk kanë parë që ujërat gjatë përmbytjes të ngrihen siç kanë bërë, duke zhdukur makinat dhe duke dëmtuar shtëpitë dhe rrugët e qytetit.
Punëtorët e shpëtimit kryen afro 1.800 operacione që nga e diela e kaluar dhe tetë departamente u vendosën në gatishmëri të lartë për përmbytjet, u tha në deklaratën e ministrisë së brendshme.
“Unë kurrë nuk kam parë ngritje të ujit kaq shpejt. Unë kam jetuar këtu për 20 vjet dhe kjo është hera e parë,” tha Jean-Louis, pensionist pranë Beziers.
Reshjet e shiut arritën 6.5 inç në 24 orë në qytetin e Beziers.
Në zona të tjera të Evropës Perëndimore, stuhitë lanë dy persona të vdekur në rajonin e Piemonte të Italisë, ndërsa autoritetet gjetën trupin e një burri në një plazh në Arenys de Mar, që ndodhet 27 milje në veri të Barcelonës. 20,000 njerëz në rajonin Spanjoll u prekën nga përmbytjet.
Të martën, ndodhi një tornado në Ibiza, duke plagosur tre persona dhe duke shkatërruar qindra pemë.
