Theofilus Solomon dëmtohet në stërvitjen e fundit, dhe sipas të gjitha gjasave, do të mungojë sot ndaj Skënderbeut. Edhe pse trajneri Franko Lerda deklaroi se situata e sulmuesit nigerian do të vlerësohet sot. “Panorama Sport”, bën të ditur se ai ka pësuar një tërheqje në kofshë dhe duket e pamundur të jetë i gatshëm.
Por gjithsesi, edhe pse një lojtar i rëndësishëm për skuadrën, konkurrenca në skuadër është e madhe, teksa për një pozicion ka 2-3 alternativa dhe kjo mungesë mund të zgjidhet lehtë.
Në stërvitjen e djeshme, Lerda, u mundua të përziente kartat, ku Italiani është munduar të fshehë gjithçka.
Mirëpo, nisur nga paraqitja në ndeshjen e fundit ndaj Vllaznisë, sot shanset më të mëdha janë që të luajnë për herë të parë së bashku treshja Bardhi-Asani-Mala. Shkëlqimi i tyre në Shkodër, ka dhënë sinjale të forta se edhe Lerda, do të veprojë si ish-trajneri Skënder Gega. Një vend në formacion ka zënë edhe Hektor Idrizaj, i cili në Shkodër u rikthye në fushë pas 7 muajsh si mbrojtës i djathtë.
Me skemën 4-3-3 i sakrifikuari në mbrojtje është Eneo Bitri, ndërsa në mesfushë ka më shumë “luftë”. Rrezikojnë ta nisin nga stoli pikërisht Broja dhe Romero. Ky i fundit mungoi ndaj Vllaznisë për shkak pezullimi, ndërsa kundër Skënderbeut është i gatshëm.
Ndërkohë duhet përmendur që Skënderbeu, pritet të ketë tre mungesa të rëndësishme ndaj Partizanit, ku përveç Gjergji Muzakës, i dëmtuar prej disa kohësh, do t’u shtohet mungesa e Tortullit dhe Ajetit.
