Denoncimi i fallxhores Arta Selimaj nga emisioni investigativ “Stop”, ka nxjerrë në pah edhe mosfunksionimin e sistemit të drejtësisë. Dy studentët që kanë denoncuar fallxhoren për mashtrim, zbuluan se janë kallëzuar nga vetë ajo, sipas të cilëve, fallxhorja ka bërë denoncim të gënjeshtër. Për emisionin “Stop” ata thonë se Arta Selimaj ka bërë denoncim të rremë ndaj tyre, duke pretenduar se ata e kishin kanosur në mes të Durrësit.
Prokurorja që ka marrë këtë çështje, Oltiana Çifliku Gjoni, ka regjistruar procedimin penal ndaj të rinjve më 4 Nëntor 2016. Dy studentët thonë se mësuan që janë nën hetim në Janar të vitit 2019. Pra, për 3 vite kanë qenë në kërkim, por nuk dinin asgjë pasi askush nuk i kishte thërritur për të dëshmuar dhe për t’i vënë në dijeni që ndaj tyre ka një kallëzim penal.
Studentët: “Procedimi penal është regjistruar më datë 4 të muajit Nëntor të vitit 2016. Ne e marrim vesh në Janar të vitit 2019. Ne nuk kemi marrë asnjë thirrje dhe asnjë lajmërim. Bëhet fjalë për prokuroren Oltiana Çifliku Gjoni, e cila na akuzon për veprën penale kanosje në bashkëpunim. Ne jemi plotësisht të sigurtë që s’na kanë marrë kurrë në pyetje. Ne kemi një banesë që jemi të regjistruar ku banojmë. Ata duhet të kishin ardhur se s’bën. Mund të kishin shkuar te familja ime, t’i binin derës dhe të informonin se djali juaj duhet të paraqitet në Prokurori për të dhënë dëshminë e tij”.
Përmes kamerës së fshehtë, “Stop” arriti të provojë shkeljen që ka bërë prokurorja Oltiana Çifliku Gjoni ndaj Kodit të Procedurës Penale. Dy studentët u takuan me Dorian Hudhrën, oficerin e policisë gjyqësore, i cili thotë qartë se për dy vite nuk është marrë aspak me hetimin ndaj tyre, duke akuzuar prokuroren se e ka harruar dosjen në “sirtar”.
OPGJ, Dorian Hudhra: Mos u kap me asnji oficer. Unë jam oficer, sic janë dhe 200 të tjerë. Nuk jam unë, mund të jetë dikush tjetër në këtë cështje, por realisht është kjo. Kallzimin e ka marrë oficer tjetër. Ma ka delegu prokurori. Dosja më është delegu mu, merr dosjen, zgjidhe, vazhdo! Unë kam bërë ca veprime fillimisht, atë kohë dhe s’jam marrë fare dy vjet, meqënëse pyete po të them. Unë s’kam, pse rrej, sepse cfarë kuptimi ka kjo?!
Qytetari: Nuk e di, sesi bëhet kjo puna juaj, e oficerëve, që shkruani dhe bëni cfarë thotë njëra palë, kur bëhet një denoncim shikohet edhe pala tjetër?
OPGJ, Dorian Hudhra: Shiko, si funksionon! Prokurori na jep detyra neve, përderisa mua s’më ka dhënë detyra gjithë këto vite…! Po që është dy vjet kohë, domethënë, që unë, as unë, asnjë oficer tjetër, nuk ka bërë asnjë lloj detyre, asnjë veprim.
Dy studentët patën një bisedë të shpejtë edhe me vetë prokuroren Oltiana Çifliku Gjoni. Ata e pyesin përse nuk i ka thërritur asnjëherë gjatë 3 viteve për hetimin ndaj tyre. Vetë prokurorja Oltiana Çifliku Gjoni u përgjigjet me arrogancë, duke u thënë se do të shihet me ta në sallën e gjyqit në datën e njoftuar.
Qytetari 1: Znj. Prokurore Përshëndetje! Mund të flasim pak?
Prokurorja Oltiana Çifliku: Po!
Qytetari 1: Pse nuk na ke thirrur asnjëherë për akuzën, që rëndon mbi ne? Të marrësh edhe dëshminë tonë?
Prokurorja Oltiana Çifliku: E more datën e gjykimit?
Qytetari 2: E morëm datën e gjykimit, por nuk prisnim, që kjo çështje të shkonte në gjykim!
Prokurorja Oltiana Çifliku: Datën e gjykimit do të vini!
Qytetari 1: Është bërë një padrejtësi këtu…!
Studentët akuzojnë prokuroren se i gjithë procesi ndaj tyre është i njëanshëm.
“Çdo gjë është bërë vetëm në një drejtim. Neve na kanë nxjerrë jashtë loje. Është e njëanshme”.
Kjo çështje gjyqësore është në Gjykatën e Shkallës së Parë të Durrësit, ndërsa drejtuesi i emisionit “Stop” Saimir Kodra apeloi që Gjykata të marrë në konsideratë faktin se prokurorja e çështjes nuk ka kryer hetime dhe nuk ka thërritur asnjëherë dy studentët, të cilët janë palë e përfshirë.
/tvklan.al/
