Gjykata e Krimeve të Rënda vendosi masën e arrestit shtëpiak për Petrit Dukin, i arrestuar më 16 tetor, pasi çau me makinë kordonin e policisë në Shkozë, ku po shembeshin disa banesa.
Vendimi u dha nga gjyqtari Bib Ndreca. Duki u arrestua nga policia më datë 16 tetor 2019 me akuzën “vrasje me dashje në rrethana të cilësuara”, e mbetur në tentativë.
Por prokuroria e Krimeve të Rënda ka bërë ndryshimin e cilësimit ligjor, duke e akuzuar Dukin vetëm për “Kundërshtim të forcave të policisë” dhe “Kanosje për shkak të detyrës”, duke kërkuar caktimin e masës së sigurisë “Arrest në burg”.
Në caktimin e masës së sigurisë në sallë ka qenë prezent edhe ish-deputeti dhe ish-Ministri i Drejtësisë Aldo Bumçi, i cili nuk është pranuar në caktimin e masës së sigurisë.
Petrit Duki dhe avokati i tij, Arbër Hoxha, kanë deklaruar se do të apelojnë masën e sigurimit “Arrest shtëpie” në Gjykatën e Apelit.
