Shoqëria civile ka zhvilluar ditën e sotme një protestë para prezencës së OSBE në Tiranë.
Ata kërkojnë largimin e ambasadorit Berndt Borschardt, pas gjestit të turpshëm ndaj protestuesve të “Unazës së Re”.
Në një prononcim për Syri TV, avokati Altin Goxhaj u shpreh se, misioni i OSBE në Shqipëri u kompromentua rëndë.
Sipas tij, një kartolinë me gishtin e Borschardt do ti dërgohet zyrtarëve evropianë në Bruksel.
“Do ti dërgojmë BE 500 kartolina me gishtin e Borschardt. Shkarkojeni këtë njeri sepse e ka kompromentuar misionin tuaj diplomatik në Shqipëri.
Ky njeri nuk mund të qëndrojë më. Ky monument do të kalojë në institucione të ndryshme, sipas sjelljes së tyre. Nuk kemi asgjë me të majtët, por me ata që janë në shërbimin e George Soros.
Ky është monumenti i sinqeritetit pasi për 27 vjet, ndërkombëtarët e Soros u kanë futur gishtin shqiptarëve”, u shpreh avokati Goxhaj.
Sa i përket peticionit që po përgatisin gratë e “Unazës së Re”, avokati Goxhaj u shpreh pro saj dhe i gatshëm ti bashkohet nismës që kërkon shpalljen “non-grata” të diplomatit gjerman të OSBE.
