Pa kaluar ende 24 orë nga ‘gishti i mesit’, ambasadori i OSBE-së në vendin tonë, Bernard Borchardt, ju ‘heq’ të drejtën shqiptarëve edhe për zgjedhje të parakohshme.
Në një intervistë për Zërin e Amerikës, ambasadori Borchardt ka komentuar edhe kërkesën e opozitës për zgjedhje të parakohshme, për të cilën ai thotë se në Kushtetutën e Shqipërisë zgjedhjet do të zhvillohen pas 1 viti e gjysmë.
Kjo është një tjetër deklaratë e ambasadorit të OSBE, i cili rreshtohet sërish në krahë të rilindjes, duke marrë në mbrojtje Ramën, pasi sipas tij Kushtetuta parashikon zgjedhje njëherë në 4 vjet, por kur vjen puna tek mekanizmat për zgjedhje të parakohshme, ai shton se për këtë duhet vullnet politik, por që në këtë rast OSBE nuk mund të ndërhyjë.
Pjesë nga intervista:
Pyetje: Kemi një insistim të vazhdueshëm nga opozita për zgjedhje të parakohshme. A mund të jetë gati reforma në rast zgjedhjesh të parakohshme?
Ambasadori Borchardt: Di që ka shumë spekulime për zgjedhje të parakohshme, por Shqipëria ka një kushtetutë dhe, sipas kësaj kushtetute, zgjedhjet zhvillohen në vitin 2021, pra diçka më shumë se pas një viti e gjysmë. Ka mekanizma në kushtetutë për zgjedhje të parakohshme, por ky është një vendim politik, në të cilin unë, sigurisht, nuk kam zë.
