Kryetari i Partisë Demokratike, Lulzim Basha ka akuzuar se gjyqtari Arben Micko dhe prokurori Bledar Maksuti vepruan me urdhër politik, me lënien në burg të tre protestuesve të “Unazës së Re” në kryeqytet.
Ishte prokurori Bledar Maksuti që kërkoi masën e sigurimit arrest me burg për tre protestuesit. Masë që u konfirmua nga gjyqtari Arben Micko.
“Me urdhër të Edi Ramës, gjyqtari Arben Micko dhe prokurori Bledar Maksuti mbajtën sot në arrest Skender Dodën, Gramoz Shehun dhe Ilias Katiraj. Tre baballarë mbahen në burg sepse mbrojnë shtëpitë e fëmijëve nga Hajduti Psiqik, Damian Lala dhe Taulant Yaris Bego që duan të vjedhin 40 milionë euro te Unaza e Re”, shprehet Basha.
“Sot Edi Rama duhej të ishte në burg për veprën kriminale të pastrimit të parave dhe ndërhyrjes me para të pista në fushatën e Presidentit Obama. Damian Lala dhe Taulant Yaris Bega duhet të ishin në qeli, bashkë me Sajmir Tahirin për aferat e tyre hajdutërore dhe bashkëpunim me narkotrafikantët.Me hajdutë në qeveri dhe njerëz të pafajshëm në burg, nuk ka Europë, as zhvillim, as drejtësi. Vetëm largimi i kësaj bande hap rrugën drejt normalitetit dhe mirëqenies”, shton krydemokrati në një reagim.
Basha lajmëron bashkimin me banorët e “Unazës”, në protestën e pasdites së sotme: “Sot në ora 18:00 të bashkohemi në protestë në krah të banorëve të dhunuar te Unaza e Re, kundër hajdutërisë dhe padrejtësisë”.
