Nga Lulzim Omuri
Akoma pa u qetësuar nga emocionet maratonë të kalimit të reformës në drejtësi, qytetarët e qarkut të Kukësit dhe të gjithë përdoruesit e rrugës së kombit lexuan në media se shpallet taksambledhësi shtesë për këtë rrugë.
Thonë që “të varfërit i shpohet daullja edhe në dasëm”!
Hapja e kësaj rruge uli në mënyrë të dukshme kostot e transportit si dhe kohën për udhëtimin nga Kukësi drejt metropolit dhe bregdetit dhe jo më pak e rëndësishme shkurtoi distancën Shqipëri -Kosovë, edhe një arsye që quhet “Rruga e Kombit”. Shumë banorë të zonës u kthyen në pronat e tyre dhe ndërtuan, dikush një shtëpi, dikush tjetër investoi në bujqësi apo blektori, pasi tashmë tregu dhe koha ishin shumë më afër e më shkurt. Gjithashtu kjo rrugë ndikoi shumë edhe në turizmin duke dashur të përmendim dhjetë-fishimin e turistëve në Valbonë, në malet e Kukësit, në të gjithë luginën e Drinit të Zi dhe atij të bardhë.
Dukshëm është edhe interesi i Kryetarit të Bashkisë Kukës Z. Bashkim Shehu për realizimin e kushteve të favorshme për investime në afrimin e shumë bizneseve në mënyrë që të ndikojë në uljen e papunësisë në një zonë ku për nga niveli i papunësisë renditet ndër të parat në rang kombëtar, në mos i pari.
Në këtë analizë nuk dua të përqëndrohem në kanalin e impaktit që do të ketë vendosja e kësaj takse në turizëm ku mbi 50 % vijnë në vend nga trojet shqiptare duke përshkuar rrugën e kombit. Ky impakt do të jetë një tregues i reflektuar direkt në shifrat e turizmit vitin e ardhshëm.
Po çfarë ndodh?
Në 22 korrik jepet njoftimi për shpalljen e një fituesi privat madje i huaj, në një rrugë të ndërtuar nga taksat e qytetarëve shqiptarë. Kjo nuk është një rrrugë e ndërtuar nga një firmë private e cila në bazë të një kontrate edhe mund ta shfrytëzonte post ndërtimit, por fakti është se e gjithë kjo është një investim publik nga buxheti i shtetit.
Qytetarët shqiptarë paguajnë sot taksën e qarkullimit e cila paguhet çdo vit nga përdoruesit e automjeteve.
Në këto kushte është fare e thjeshtë situata që do të krijohet. Qytetarët do të paguajnë 3 herë të njëjtën rrugë. Një herë kur u ndërtua, një herë në vit në taksën e qarkullimit dhe tashmë për çdo kalim që do të bëjnë.
Kur një rrugë bëhët me pagesë, gjithmonë shteti ka për detyrë të ofrojë një rrugë alternative për ata që nuk kanë mundësi ta paguajnë atë. Mos vallë po i fton të kalojnë rrugës së vjetër përsëri?
Nëse bëjmë një krahasim për autostradën në një vend fqinj si Maqedonia. Aty paguhet 5.5 euro për 300 km. Ndërsa ne do të paguejmë 5 euro për 100 km një rrugë publike.
