Pakënaqësia ndaj kryetarit të fshatit ka arritur kulmin në Meksikë. Banorët e kanë marrë zvarrë kryetarin e tyre duke e lidhur pas një makine pasi e nxorën nga zyra e tij.
Policia ndërhyri për të shpëtuar kryetarin jose Luis Escandon Hernandez, për të cilin u raportua se nuk ka pasur dëmtime të mëdha.
Kjo nuk ishte hera e parë që kryetari i fshatit sulmohej nga fermerët e asaj zone që kërkojnë nga ai vetëm riparimin e një rruge lokale, premtim i dhënë nga ai kohë më parë. Autoritetet kanë dërguar forca shtesë në rajonin Chiapas për ta siguruar rendin publik pas kësaj ngjarjeje të pazakontë.
Kryetarët e qyteteve dhe politikanët lokalë në Meksikë shpesh bien pre e sulmeve nga bandat e drogës, sidomos kur refuzojnë të bëhen pjesë e skemave të tyre kriminale, por ndodh më rrallë që zyrtarët të sulmohen për shkak të premtimeve të dhëna para zgjedhjeve.
Escandon tha se do t’i padisë personat e dyshuar për rrëmbim dhe vrasje në tentativë.
