Presidenti Ilir Meta ka vlerësuar procesin zgjedhor në Kosovë, që u zhvillua më 6 tetor.
Madje ai i krahasoi zgjedhjet e mbajtura atje si të ngjashme me ato në Danimarkë.
Gjatë një bashkëbisedimi me studentë të një universiteti privat, Meta theksoi se sistemi zgjedhor që ka Kosova detyron partitë që të vendosin në krye të listave emra sa më përfaqësues.
Meta ka vlerësuar në këtë kuadër listat e hapura të kandidatëve, element që e cilëson si çelësin e suksesit.
Duke bërë një krahasim mes Kosovës dhe Shqipërisë, Meta u shpreh se ndryshimet Kushtetuese të 2008-ës dhe vendosja e listave të mbyllura, bënë që edhe partitë të mbyllen dhe të mungojë demokracia e brendshme, oponenca dhe mendimi ndryshe.
“Kjo e ka goditur në thelb demokracinë parlamentare dhe ky problem duhet parë me kujdes”, theksoi ai.
