Holanda është një nga vendet që ka paralajmëruar votën e saj kundër hapjes së negociatave mes Shqipërisë dhe BE-së. Vendimi pritet të jepet zyrtarisht më 17-18 tetor, atëherë kur Këshilli do të shprehet për Maqedoninë e Veriut dhe Shqipërinë.
Por pavarësisht qbndrimit tashmë të shprehur nga Parlamenti holandez dhe ministri i Jashtëm i Holandës, Edi Rama duket se po përdor edhe kartën e fundit për të bindur vendet skeptike lidhur me marrjen e një “PO” për negociatat.
Karta që po përdoret së fundmi është fakti se qeveria shqiptare ka në përbërjen e saj 8 ministre nga 15 që ka gjithë kabineti.
Në fakt Shqipërisë nuk i është thënë “JO” nga Holanda për barazinë gjinore, por për krimin e organizuar dhe korrupsionin.
“Tetë nga 15 ministritë e Qeverisë shqiptare drejtohen nga gratë; si nëna dhe vajza, si gra që luftojnë për familjet tona dhe për vendin tonë, ne do të donim të shtronim me ju një çështje që na shqetëson shumë të gjithëve, e cila ka rëndësi të jashtëzakonshme për të gjithë shqiptarët- perspektiva evropiane e vendit tonë”, thuhet ndër të tjera në letrën e firmosur nga tetë ministret drejtuar qeverisë holandeze..
Gjithashtu në letër thuhet se në Shqipëri ka një admirim për Holandën, si një komb me tradita të mëdha dhe një rekord të guximit politik e tolerancës shoqërore.
“Bashkëpunimi mes Shqipërisë dhe Holandës në luftën kundër krimit të organizuar, sidomos vitin e kaluar ka qenë më i thellë se kurrë më parë…
Shpresojmë ta kuptoni se sa e vështirë është beteja jonë, të cilën nuk mund ta fitojmë të vetëm”, shkruhet më tej, “dhe disa nuk duan që ne ta fitojmë, përfshirë dhe një pjesë këtu në vendin tonë.
Dështimi i përpjekjeve tona për të çelur bisedimet e anëtarësimit është çmimi më i madh për këto forca të errëta. Ne nuk kërkojmë që të ndryshoni pikëpamjet tuaja, thjesht duam që të bashkoheni me kombet e tjera të Europës duke i shtrirë dorën Shqipërisë dhe të na lejoni t’i çojmë këto përpjekje tonat në të një tjetër nivel”, thuhet në letër.
