Sekretari i Përgjithshëm i PD-së, Arben Ristani i jep fund dilemave për një koalicion të mundshëm me LSI.
Pas zhvillimeve më të fundit që paraprinë miratimin e Reformës, deklaratës së Metës për zgjedhje të parakohshme dhe gjithë debatit për çarje mes koalicionit qeverisës, Ristani thekson se qëllimi i opozitës mbeten zgjedhjet e parakohshme.
“Nuk mund të ketë një aleancë me dy partitë që janë në pushtet, ne jemi kundërshtarë të tyre dhe mendojmë se janë të dy përgjegjës për gjendjen e Shqipërisë dhe nuk mund të kemi një aleancë”– tha ai në një intervistë për “Ora News”.
Sipas tij, për PD, qeveria teknike është zgjidhja e vetme që ne në Shqipëri të kemi zgjedhje të lira dhe të ndershme.
“Në rast se ne nuk arrijmë të shkojmë pa Ramën në zgjedhjet e ardhshme, garancia që do të ketë zgjedhje të lira dhe të ndershme shkon drejt niveleve më të ulëta”– tha ai.
“Së pari reforma të tilla po jo vetëm të tilla, por për cdo gjë që diskutohet në grupin e PD janë pjesë e punës. Nuk mund të jemi të gjithë në një mendje dhe kjo është fare normale”– theksoi Ristani.
