Austria do të mbështes Shqipërinë në rrugën e saj drejt integrimit të BE-së. Kjo është deklarata që bëri gjatë ditës së sotme në takimin që pati me ministrin në Detyrë Genta Cakaj, ministri federal për evropën, integrimin dhe punët e jashtme të Austrisë, Alexander Schallenberg. Ky i fundit deklaroi se Shqipëria nuk ka rrugë tjetër përveç asaj të bashkimit me vendet e tjera të BE-së.
Njoftimi
Ministri në Detyrë për Evropën dhe Punët e Jashtme, Gent Cakaj, ka pritur sot në vizitë zyrtare në Tiranë Ministrin Federal për Evropën, Integrimin dhe Punët e Jashtme të Austrisë, Alexander Schallenberg. Vizitë kjo që vjen në një moment të rëndësishëm për shkak të rrethanave dhe ka një vlerë të veçantë për kohën kur zhvillohet. Nga ana tjetër, ministri Schallenberg siguroi mbështetjen e Austrisë për hapjen e negociatave të anëtarësimit të Shqipërisë me BE.
“Diskutimi ynë u përqendrua pikërisht në të arriturat e Shqipërisë në 5 prioritetet kyçe për një vendim pozitiv në hapjen e negociatave me BE. Austria e ka shprehur qartë mbështetjen e saj dhe është e bindur se për Shqipërinë nuk ka alternativë tjetër përveç Bashkimit Evropian. Momentumi historik për hapjen e negociatave me Shqipërinë duhet të kapet tani!” – shkruan Cakaj në një postim në Facebook.
Por biseda u fokusua dhe tek marrëdhëniet dypaleshe dhe nevojën e shtimit të bashkëpunimit në fusha si energjetika, transporti dhe infrastruktura. Gjithashtu u vlerësua pozitivisht bashkëpunimi i deritanishëm në fushën e diplomacisë shumëpalëshe duke filluar nga bashkëpunimi në kuadër të OSBE-së e deri në mbështetjen e kandidaturës së Shqipërisë për një vend jo të përhershëm në Këshillin e Sigurimit të OKB-së për periudhën 2022-2023.
Duke u ndalur tek kryesia e OSBE nga Shqipëria, Austria ka ofruar edhe mbështetje teknike përmes atashimit të një eksperti austriak i cili do asistojë Kryesinë shqiptare përgjatë vitit të ardhshëm.
