Sërish ndryshime në postet drejtuese të Kadastrës së Vlorës. Ditën e sotme, mësohet se kanë dhënë doreheqjen drejtoresha Elona Hodaj dhe zv drejtori Krenar Xhemali.
Dyshimet janë se dorëheqja ka lidhje me “dosjen e Jalës”. Nën hetim javë vënë 23 punonjës të Kadastrës së Vlorës, pasi akuzohen se kanë tjetërsuar pronën e një personi në Jalë duke ia kaluar një tjetri.
Pronësia e truallit është fituar me vendim të formës së prerë të gjykatës se Apelit në Vlorë. Gjatë procesit, është vërtetuar ndër të tjera se pretendentët përballë tyre kanë depozituar dokumente pronësie të falsifikuara. Ndaj, pas shpalljes së vendimit të formës së prerë, ASHK ka regjistruar pronën. Ngërçi është krijuar kur pala tjetër e cila pretendon pronësinë e saj, me një vendim të gjykatës së lartë nr 246 dt 23.04.2019 është kërkuar bllokimi provizor i pasurisë tashmë të regjistruar. Deri më tani, në rrokadë janë ndërruar tre drejtorë nga të cilët për shkak të presioneve të situatës, janë dorëhequr me motivacionin e arsyeve personale.
Elona Hodaj, ish-kandidate për deputete dhe ish-kryetare e degës së FRESSH-it në Vlorë, u emëruar në krye të Kadastrës së Vlorës muajin e kaluar. Në shtator, brenda dy javësh, u largua kupola drejtuese e kadastrës në Vlorë, 6 juristë dhe u paralajmëruan 19 të tjerë.
