Faqja e medias Boldnews.al, në Facebook prej tri ditësh është e bllokuar, e për pasojë asnjë lajm nuk mund të publikohet. Sulmi ndaj kësaj media, është i sponsorizuar nga qeveria e Rilindjes, Bashkia e Tiranës nën drejtimin e Veliajt, ose siç njihet rëndom nga Lali Eri dhe kompanisë së drejtuar nga vajza e ambasadores Filloreta Kodra, Acromax Media GmBH.
Kjo kompani është e autorizuar nga qeveria për të bllokuar çdo lajm apo informacion në rrjetet sociale, që demaskojnë mashtrimet e Rilindjes.
Madje kjo kompani e njohur si ‘Acromax Media GmBH’, ka marrë bekimin e qeverisë dhe të gjithë pushtetit rilindas që të ndërhyjë dhe të bllokojë çdo postim apo video në rrjetin social facebook, edhe kur ato janë bërë nga persona apo media të caktuara.
Mbi këtë kompani ka patur akuza të forta edhe nga vetë ligjvënësit shqiptarë, ku më i fundit është bërë nga një deputet i opozitës, të cilit i janë hequr nga Facebook disa video të fjalimeve të tij të mbajtura nga salla e Kuvendit si dhe disa intervista televizive.
Kjo kompani e drejtuar nga vajza e ambasadores Kodra, po përdoret si një armë e fortë nga rilindja për të censuruar fjalën e lirë, duke mos lejuar asnjë video apo lajm që demaskon propagandën e mashtrimit para qytetarëve shqiptarë.
Pre e këtij sulmi të furishëm kanë rënë prej disa ditësh edhe redaksia e Boldnews.al si dhe gazetarët e saj, të cilët sulmohen vazhdimisht me anë të ‘reporteve’ nga njerëz që fshihen pas profileve anonime, por që dukshëm janë militantë dhe servilë të Rilindjes.
Gjithashtu kjo kompani ka sulmuar herë pas herë edhe lajmet e publikuara me video nga Boldnews.al (të cilat janë prodhim i redaksisë), duke i cilësuar ato si të vetat.
Boldnews.al prej ditës së parë që është hapur si media dhe deri më sot, ka qenë media e paanshme dhe objektive në çdo lajm apo informacion të sajin, çka është parë si armiqësi e hapur me Rilindjen dhe riilindasit, të cilët çdo media të lirë dhe të pavarur në këtë vend që bien në kundërshti me realitetin që duan të paraqesin rilindasit e sulmojnë me të gjitha mjetet e mundshme.
Boldnews.al bën me dije se pavarësisht këtyre sulmeve të vazhdueshme dhe dashakeqe për të censuaruar informimin përmes fjalës së lirë qytetarët e Shqipërisë dhe përtej saj, do të vijojë punën e saj për të përçuar deri në fund mesazhet tek çdo lexues i saj.
Boldnews.al edhe pse në pamundësi për të informuar ndjekësit dhe shqiptarët përmes rrjeteve sociale, vijon të funksionojë normalisht me çdo informacion, duke qenë e para në lajmin e fundit dhe në përcjelljen e lajmit të thelluar në investigime, drejtësi dhe politikë përmes web-it.
