Një vajzë 13-vjeçare, me inicialet S.B, u rrëmbye pasditen e sotme në afërsi të rrugës Ndre Mjeda në Tiranë.
Ngjarja ka ndodhur në prani të dëshmitarëve të shumtë, që kanë ngritur në alarm policinë, pasi vajza është marrë me forcë nga një person ende i paidentifikuar në një automjet tip Fiat Punto, ngjyrë e kuqe.
Gjurmët e automjetit kanë humbur në zonën e njohur si fusha e aviacionit.
Raportohet se policia është vënë në gadishmëri, ku veç komisariateve janë angazhuar edhe efektivë të Repartit Shqiponja.
Komisariatet e policisë 2, 3, 5 dhe 6 në kryeqytet, përfshi edhe atë të Vorës, kanë nisur patrullimet dhe kërkimet në terren.
Mësohet se gjithashtu janë sinjalizuar komisariatet e policisë në qytetet e Fushë Krujës, Krujës, Durrësit, Elbasanit, që janë në kufi me Tiranën.
Në kryeqytet janë ngritur disa pika kontrolli, ndërsa janë marrë në pyetje familjarë të vajzës lidhur me konflikte të mundshme.
Gjithashtu kamerat e sigurisë po shqyrtohen nga policia, për të bërë të mundur identifikimin e mjetit, që më pas të mund të zbulohet edhe pronari i tij.
Mësohet se vajza ka reaguar duke bërtitur, çka ka tërhequr vëmendjen e kalimtarëve të shumtë, që kanë njoftuar më pas policinë.
Raportohet se personi që ka realizuar rrëmbimin e të miturës ka qenë i vetëm në automjet.
Vajza ka zbritur nga një furgon shkolle, vetëm pak metra larg banesës së saj, ku edhe duket se personi që ka realizuar rrëmbimin se e priste. Ende nuk dihen shkaqet e një ngjarje që ka tronditur kryeqytetin, ndërsa e gjithë skena e rrëmbimit është parë në largësi edhe nga gjyshja e vajzës, e cila ishte në ballkon dhe priste mbesën e saj në shtëpi.
