Shqipëria nuk është e gatshme për hapjen e negociatave me BE, ndërsa Maqedonia e Veriut ka ndërmarrë hapa të mëdhenj përpara për sundimin e ligjit.
“Maqedonia e Veriut ka bërë hapa në përparimi në sundimin e ligjit, që duhet të vazhdohen, kështu që ne shohim se ka hapësirë për të”, tha ministri.
Ky pritet të jetë qëndrimi që do të mbajë Holanda, në takimin e ministrave të Jashtëm të BE-së që do të zhvillohet më 15 tetor, dy ditë para mbledhjes së Këshillit Europian.
De Telegraaf paralajmëron se ministrat e Jashtëm të BE do të diskutojnë çështjen dhe nëse ata nuk mund ta zgjidhin atë, ajo do të kalohet për diskutim në takimin e krerëve evropianë të shteteve anëtare të BE, Presidentë dhe Kryeministra.
“Korrupsioni është ende i shfrenuar në Shqipëri dhe vendi së fundmi ka qenë “narco-shteti i vetëm i Evropës”. Shqipëria është një furnizues i madh i marihuanës. Një raport i Departamentit Amerikan të Shtetit përshkroi “korrupsionin e madh dhe institucionet e dobëta qeveritare” dhe foli për trafikun e qenieve njerëzore, rrjetet e drogës dhe evazionin e taksave në shkallë të gjerë. Mediat britanike si The Guardian dhe The Independent e cilësuan Shqipërinë si “Kolumbia e Evropës””, shkruan De Telegraaf.
Sipas ministrit të Jashtëm, Stef Blok, Shqipëria nuk është ende gati për të hapur negociatat.
“Shqipëria duhet të ndërmarrë hapa të mëtejshëm, veçanërisht në trajtimin e korrupsionit dhe përmirësimin e sundimit të ligjit,” tha Blok pas Këshillit të Ministrave. Dhoma e Përfaqësuesve kaloi një mocion në qershor në të cilin një shumicë e madhe foli kundër bisedimeve të pranimit me Shqipërinë.
Në një letër të përbashkët, Presidenti i BE Tusk, Presidenti i Parlamentit Evropian Sassoli, Presidenti i Komisionit Evropian Juncker dhe pasardhësja e tij, Ursula von der Leyen, kërkuan fillimin e bisedimeve me të dy vendet.
“Maqedonia Veriore dhe Shqipëria kanë bërë atë që kemi kërkuar prej tyre”, shkruajnë drejtuesit e BE-së në letrën e tyre.
