Kryeministri Edi Rama tha se nuk ka ndërmend të ulet tani dhe të diskutojë lidhur me teletajet që jep opozita jashtë Parlamentit, pasi e ka vëmendjen te vendimi për hapjen e negociatave.
Rama tha se brenda vitit do të bëhen funksionale Gjykata e Lartë dhe ajo Kushtetuese.
“Angela Merkel ka argumentuar në sy të të gjithë të pranishmëve kur ishim bashkë në Poznan dhe ka argumentuar para grupit të saj parlamentar këtë: më thoni se Shqipëria nuk ka Gjykatë Kushtetuese, por ky është një sukses i vetting apo një dështim i sistemit. Do t’i themi bravo për këtë, do i themi Po për negociatat. Këtë e ka thënë Angela Merkel, një njeri shumë më i madh. Këtë fjali duhej t’a thoshte opozita, PD te miqtë e saj në CDU.
Nuk është dështimi im pse Emmanuel Macron shikon një Europë tjetër. Holanda ka qëndrimin e saj dhe ka të gjithë të drejtën e saj, por nuk mund të më thotë mua askush që Holanda është intolerante ndaj krimit, por Finlanda është tolerante.
Holanda është skeptike për çdo vend që kërkon afrimin me BE dhe kjo s’ka lidhje me kriteret objektive të vlerësimit, por për interesat e saj.
Dje ishin bullgarët delja e zezë, thonin se kishin vrarë Papën, ndërsa tani dalin shqiptarët si delja e zezë.
Ne nuk po shkojmë te pema e Vitit të Ri, por po shkojmë të një familje që ka probleme.
Nuk fajësoj as Francën dhe as Holandën, ata janë në shtëpinë e tyre. Por kur më thonë se këtë e ka përgjegjësi Edi Rama, kjo është për të vënë duart në kokë”, tha Rama.
